Россия президенти Владимир Путин ўз мамлакатидаги нодир ер металларини қазиб олиш бўйича АҚШ билан ҳамкорлик қилмоқчи. У икки мамлакат биргаликда алюминий ишлаб чиқариши мумкинлигини ҳам айтди. Бу ҳақда Кремль хабар берди.
Биз Америка компаниялар билан ушбу йўналишда ҳамкорлик қилиш ҳақида ўйлашимиз мумкин. Масалан, Красноярск ўлкасида совет даврида янги гидроэлектр станцияси қуриш ва қўшимча алюминий ишлаб чиқариш корхоналарини ташкил этиш режалари мавжуд эди, деди Путин.
У бу лойиҳа “инвестицион салоҳиятга эга” бўлиши мумкинлигини таъкидлади.
Дастлабки ҳисоб-китобларга кўра, у бугунги нархларда тахминан 15 миллиард долларга баҳоланади ёки баҳоланиши мумкин. Лекин биз бу ҳақда ўйлаб кўришимиз керак, дея таъкидлади Россия раҳбари.
Россия ҳудудидаги нодир ер металлари ҳақида гапирар экан, Путин бугунги кунда мамлакат уларни ўзлаштириш учун етарлича иш қилмаётганини айтди.
Нодир ер металлари — замонавий иқтисодиёт тармоқлари учун жуда муҳим компонент, ғоят муҳим ресурслардир. Биз ҳозирча бу йўналишда кам иш қиляпмиз. Кўпроқ қилишимиз керак, деди у.
Аввалроқ АҚШ президенти Дональд Трамп Россияда Вашингтон манфаатдор бўлган ресурслар, жумладан, нодир металлар борлигини айтган эди.
Путиннинг сўзларига кўра, Россия ерости металларини қазиб олишга хорижий ҳамкорларни, жумладан, АҚШни ҳам жалб қилишга тайёр. У Россияда бундай элементлар Украинадагига қараганда анча кўплигини таъкидлади. Шунингдек, Путин АҚШга икки миллион тонна алюминий етказиб беришга тайёрлигини айтди.
Россия президенти бундай чоралар “нархларни барқарорлаштириши”ни қайд этди. Россиялик сиёсатчининг фикрича, Вашингтон ва Москва Красноярск ўлкасида алюминий қазиб олиш бўйича қўшма лойиҳаларни ишга тушириши мумкин.
АҚШ Украинадаги металларни қазиб олиш бўйича битим имзоламоқчи
11 февраль куни АҚШ президенти ҳарбий ёрдам эвазига Украина АҚШга ўз ҳудудида қимматбаҳо минералларни қазиб олишга рухсат беришга “деярли рози бўлганини” айтган эди. 15 февраль куни Трамп маъмурияти Украинага мамлакатнинг нодир ерости бойликларига эгалик ҳуқуқининг 50 фоизини АҚШга беришни таклиф қилгани маълум бўлди.
Аммо Владимир Зеленский ҳужжатни имзолашдан бош тортди, чунки келишув лойиҳасида “бир қатор муаммоли масалалар” бор ва у УКраина манфаатларини акс эттирмайди. АҚШ Украинага фойдали қазилмалар бўйича битимнинг янги версиясини топширган. Украина раҳбари маслаҳатчилари президентдан уни имзолашни, Трамп билан “янги келишмовчиликка бормаслик”ни тавсия қилганди. Бироқ Зеленский “украиналикларнинг 10 авлоди тўлайдиган ҳужжатни” имзоламаслигини қайд этган. Украина президенти АҚШ билан Украина минерал ресурслари бўйича битим тузиш муҳокама босқичида эканини айтди. У Киевни қониқтирмаган ҳужжатнинг бир нечта вариант кўриб чиқилганини таъкидлади.
Изоҳ (0)