Трамп Оқ уйни Tesla автомобиллари шоу-румига айлантирди

Оқ уй ҳовлисида АҚШ президентига Tesla автомашиналари намойиш қилинди. Дональд Трамп Илон Маск ҳамроҳлигида уларни кўздан кечирди. 

Президент журналистлар қаршисида Model S автомобилини сотиб олиш учун чек ёзиб беришини айтди. 

Мен чек ёзишни ёқтираман, бу замонавий тизимдан кўра яхшироқ. Шундоқ ҳам ҳисобингизга пул тушади, деди у.

Шунингдек, Трамп Маскдан чегирма сўрамаслигини айтиб, президент сифатида буни ўзига раво кўрмаслигини таъкидлади.

Бу жуда яхши маҳсулот, энг зўридан. Ва яна бир сабаб — бу инсон (Маск) ҳаётини шу ишга бағишлаган, деди Оқ уй раҳбари.

Трамп тадбиркорни мақтаб, у кичик бир гуруҳ одамлар томонидан ноҳақ танқид қилинаётганини таъкидлади.

У ватанпарварлик учун жазоланмаслиги керак, деди президент.

Трамп, шунингдек, машиналарни шахсан ҳайдамаслигини, чунки бунга рухсат йўқлигини айтди. Унинг қўшимча қилишича, янги автомобиллар Оқ уй ходимлари, жумладан, матбуот бўйича маслаҳатчи Марго Мартин томонидан бошқарилади.

Улар жуда хурсанд. Марго ҳам фойдаланади, ҳаммаси минади ва бундан завқланади, деди Оқ уй раҳбари. 

Шу билан бирга, Трамп набираси Каига ҳам машина сотиб олганини тасдиқлади. Президент бу учун ноодатий дизайнга эга Tesla Cybertruck автомобилини танлаган. 

Уни жуда ажойиб қиз учун махсус олдим. Каи голфни жуда яхши ўйнайди ва буюмларини машина юкхонасига жойлаштиради, деди Трамп.

Бироқ Оқ уйда юз берган воқеанинг энг муҳим эпизоди бу эмас. Президент акциялари пастлаб бораётган Tesla’ни қўллаб-қувватлади. Шунингдек, компанияга нисбатан зўравонлик ҳолатлари ортиб бораётганини қайд этди.

Tesla акциялари Илон Маск Оқ уйга келганидан бери қадрсизланиб бормоқда. Бунга унинг баҳсли баёнотлари ортидан бошланган бойкот кампанияси сабаб. Қолаверса, Tesla автосалонларига ҳужум уюштириб, моддий талафот етказилган ҳолатлар ҳам йўқ эмас. Бу, айниқса, Евопа мамлакатларида кенг ёйилмоқда.

Давлат раҳбарларининг муайян маҳсулотни тавсия қилиши сиёсий этика, баъзан эса қонунлар билан тақиқланган. Қолаверса, Илон Маск президентга яқин ва унинг сайловолди копманиясини молиялашга ўз ҳиссасини қўшган донорлардан бири ҳисобланади. Reuters хабарига кўра, тадбиркор бу учун 250 миллион АҚШ доллари сарфлаган. 

Шу боис танқидчилар Трампни яширин рекламада айблаб чиқди. Баъзи сиёсатчилар эса Оқ уй “шоу-румга айланганидан” норозилигини билдирди.