АҚШ Украина билан тинчлик музокараларининг санаси, жойи ва иштирокчи таркибини муҳокама қилишни бошлади. Бу ҳақда АҚШ президенти Дональд Трампнинг миллий хавфсизлик бўйича маслаҳатчиси Майкл Уолц маълум қилди.
Президент Дональд Трамп тинчлик музокаралари ташкил этилса ва ишончни мустаҳкамлаш чоралари кўрилса, Украинага ҳарбий ёрдамни тиклаш масаласини кўриб чиқади.
Трамп 3 март куни Украинага ҳарбий ёрдам кўрсатишни тўхтатди. Шундан сўнг Украина президенти Владимир Зеленский музокаралар столига ўтиришга тайёрлигини билдирди.
Биз аллақачон ишончни мустаҳкамлаш чоралари ҳақида гапирмоқдамиз, кейин эса уларни россияликларга тақдим этиб, қанчалик самарали эканини текширамиз. Ўйлайманки, агар музокараларни мустаҳкамлаб, уларга томон ҳаракат қилсак ва ишончни мустаҳкамлаш бўйича айрим чораларнинг амалий муҳокамасини бошласак, унда президент ҳарбий ёрдамни тўхтатиб туриш бўйича паузани бекор қилиш имкониятини жиддий кўриб чиқади, деди Уолц.
У АҚШ ҳар икки томон аввал қисман, кейинчалик эса доимий тинчлик йўлида самимий музокаралар олиб боришини хоҳлашини билдирди. Уолц Украина президенти Владимир Зеленскийнинг Овал кабинетдаги можаро юзасидан афсус билдиргани ҳақидаги постини “яхши ва ижобий биринчи қадам” деб атади.
Ўз навбатида, Украина президенти девони раҳбари Андрей Ермак Уолтц билан телефон орқали мулоқот қилган.
Биз адолатли ва узоқ муддатли тинчлик йўлидаги кейинги қадамларни муҳокама қилдик. Шунингдек, Украина ва АҚШ ўртасидаги икки томонлама муносабатлар доирасида хавфсизлик ва позицияларни мувофиқлаштириш бўйича фикр алмашилди. Бу муҳим ишни давом эттириш учун жамоаларимиз яқин орада учрашишига келишиб олдик, деди Зеленский офиси раҳбари.
Владимир Зеленский АҚШ ва Украина делегацияларининг учрашуви режалари ҳақидаги маълумотни тасдиқлади.
Бугун бизнинг жамоаларимиз — Украина ва АҚШ учрашув устида ишлашни бошлади. Андрей Ермак ва Майкл Уолц ижобий ҳаракат борлигини айтди. Келгуси ҳафтада илк натижаларга умид қиламиз, деди у кечки мурожаатида.
4 март куни АҚШ президенти Дональд Трамп конгрессда сўзлаган нутқида Владимир Зеленскийдан “муҳим мактуб” олганини айтди. Унинг сўзларига кўра, Зеленский Украина “барқарор тинчликни яқинлаштириш учун имкон қадар тезроқ музокаралар столига ўтиришга” тайёрлигини ёзган. Америка президенти Россия томонидан ҳам “кучли сигналлар” олганини қайд этди.
Изоҳ (0)