Буюк Британия 24 февраль куни “Россия ҳарбий машинасини қўллаб-қувватлагани” учун Қирғизистоннинг “Керемет Банк”ига қарши санкциялар қўллади. Қирғизистонлик депутат Исъҳак Масиев бунга танқидий муносабат билдирди.
Депутат Қирғизистон Ташқи ишлар вазирлигига мурожаат қилиб, санкцияларга муносабат беришни сўради.
Дунё ёмон томонга ўзгармоқда, империячилик амбициялари яна жонланмоқда. Буюк Британия Қирғизистоннинг “Керемет Банк”ига қарши санкциялар жорий этди. Гўёки Россия билан алоқалари бор эмиш. Унда улар Россияда ишлайдиган миллион нафар фуқаромизга нисбатан ҳам санкция қўллаши керак эди, деди Масиев.
У Қирғизистон Буюк Британия олдида ташқи сиёсат ва банк фаолияти бўйича ҳеч қандай мажбуриятларга эга эмаслигини таъкидлади.
Биз Британиянинг мустамлакаси эмасмиз. Қирғизистон ТИВ бунга муносабат билдириши керак, деб ҳисоблайман, дея қўшимча қилди депутат.
Британия санкциялари
Лондон Россияга қарши 2022 йилдан бери энг йирик санкциялар пакетини эълон қилди. Чекловлар бир қатор учинчи мамлакатларда, жумладан, Марказий Осиё давлатлари, Туркия, Таиланд, Ҳиндистон ва Хитойда жойлашган станоклар, электроника ва “Россия ҳарбийлари учун икки мақсадли товарлар” ишлаб чиқарувчилари ва етказиб берувчиларига қаратилган.
Қирғизистоннинг “Керемет Банк” банки ҳам Буюк Британиянинг янги санкциялар рўйхатига киритилди.
Биз биринчи марта Россия ҳарбий машинасини қўллаб-қувватловчи хорижий молия институтларини нишонга олиш учун янги ваколатлардан фойдаланмоқдамиз. Қирғизистонда жойлашган “Керемет Банк” ОАЖга нисбатан санкциялар киритмоқдамиз, бу эса Россияга ўз ҳарбий ҳаракатларини қўллаб-қувватлаш учун халқаро молия тизимидан фойдаланишига тўсқинлик қилади, дейилади Британия ҳукумати баёнотида.
АҚШ ҳам “Керемет Банк”ка санкциялар қўллаган
15 январь куни АҚШ Молия вазирлиги “Керемет Банк”ни Россияга қарши жорий этилган чекловларни четлаб ўтишда иштирок этгани учун санкциялар рўйхатига киритган эди. Вазирлик маълумотларига кўра, банк Россиянинг мудофаа саноатини молиялаштирувчи ва 2022 йилдан бери санкциялар остида бўлган Россиянинг “Промсвязбанк”и билан алоқада ишлаган.
Изоҳ (0)