Жогорку Кенеш (Қирғизистон парламенти) “хорижий агентлар” тўғрисидаги, “Нотижорат ташкилотлари тўғрисидаги қонунга ўзгартишлар киритиш тўғрисида”ги қонун лойиҳасини расман қабул қилди. Бу ҳақда 24.kg хабар берди.
Қонундаги тузатишлар учун 66 нафар депутат овоз берган, 5 нафари қарши чиққан. Kloop хабарига кўра, ҳужжат икки дақиқада қабул қилинган. Энди қонунни қабул қилиш учун мамлакат президентининг имзоси кифоя. Қонун лойиҳасида нодавлат нотижорат ташкилотлари фаолияти устидан қўшимча давлат назорати ва текширувлар ўрнатиш назарда тутилади.
Маҳаллий ОАВга кўра, агар қонун қабул қилинса, Қирғизистондаги “хорижий агентлар” “хорижий вакиллар” деб номланади. Улар Россиядаги каби реестрга киритилади. Улар учун режали (йилига бир мартадан кўп бўлмаган) ва режадан ташқари текширувлар ўтказилади.
Шунингдек, қонун лойиҳасида “хорижий агентлар” ўз фаолияти тўғрисида, жумладан, хорижий манбалардан олган маблағлар ва улардан фойдаланиш аудити, бошқарув, ходимлар сони ва уларнинг иш ҳақи тўғрисидаги маълумотлар бўйича батафсил ҳисобот бериши шарт. Бундан ташқари, ҳар олти ойда бир марта оммавий ахборот воситаларида ўз фаолияти тўғрисида ҳисобот эълон қилишади.
- Фуқароларнинг шахсияти ва ҳуқуқларига тажовуз қилувчи, фаолияти фуқароларга нисбатан зўравонлик ёки уларнинг соғлиғига зарар етказиш ёки ноқонуний хатти-ҳаракатлар қилишга ундаш билан боғлиқ нотижорат ташкилотни ташкил этиш ва бошқарганлик учун 50 мингдан 100 минг сомгача (салкам 7 миллиондан 14 млн сўмгача) жарима ёки беш йилга озодликдан маҳрум қилиш жазоси тайинланади.
- Бундай уюшмалар фаолиятида фаол иштирок этганлик ва уларни тарғиб қилганлик учун 100 минг сомдан 200 минг сомгача (салкам 14 млн сўмдан 24 миллион сўмгача) жарима ёки 10 йилгача озодликдан маҳрум қилиш жазоси назарда тутилган.
Қонун лойиҳасининг дастлабки версиясида журналистлар у Россия қонунидан кўчирилганини айтган. Ўзлаштириш улуши 69,2 фоизни ташкил қилган.
Изоҳ (0)