Жогорку Кенеш “Қирғизистон Республикасининг давлат рамзлари тўғрисидаги қонунга ўзгартишлар киритиш ҳақида”ги қонун лойиҳасини жамоатчилик муҳокамасига тақдим этди. Бу ҳақда AKIpress хабар берди.
Қонун лойиҳаси ташаббускори — депутат Мейкинбек Абдалиев (“Ата-Журт Қирғизистон” партиясидан). Муаллифнинг фикрича, қонунга ўзгартириш киритишдан мақсад фуқароларда Қирғизистон давлат рамзларига ҳурматли муносабатни шакллантириш ва қонунда белгиланган тартибда тўғри қўллашдан иборат.
Унга кўра, Қирғизистон фуқаролари ва республика ҳудудидаги шахслар давлат рамзларини ҳурмат қилишлари шарт. Давлат байроғи, давлат герби ва мадҳиясини камситишда айбдор бўлган шахслар қонун ҳужжатларига мувофиқ жавобгар бўлади.
“Аммо бу қонун-қоидаларга ҳар доим ҳам амал қилинавермайди. Сўнгги пайтларда кийим-кечакнинг турли қисмларига, жумладан, ички кийим ва пайпоқларга давлат рамзлари тасвирларини қўллаш ҳолатлари кузатилмоқда, бу эса давлат рамзларининг аҳамиятини паст баҳолайди ҳамда уларга нисбатан ҳурматсизликдан далолат беради.
Бундан ташқари, жисмоний ва юридик шахсларнинг давлат органларига тегишли бўлмаган визит карточкаларига давлат рамзлари тасвирларини жойлаштириш ҳоллари кўпайиб, бошқа шахслар томонидан чалкашликларга сабаб бўлмоқда. Жисмоний ва юридик шахсларнинг ижтимоий тармоқлардаги шахсий аккаунтлари ва тижорат сайтларида давлат рамзлари тасвирларини жойлаштириш ижтимоий тармоқларнинг бошқа фойдаланувчиларини ҳам чалғитади”, — дейди у.
Абдалиэв давлат рамзлари давлат суверенитетининг энг муҳим атрибутлари эканини, шунинг учун ҳам ундан фойдаланишда муайян чекловлар (қатъий қонунчилик даражасида) ўрнатиш зарурлигини таъкидлади.
Шундай қилиб, “Давлат рамзлари тўғрисида”ги қонунга 9-1-модда биринчи қисмининг тўртинчи ва бешинчи хатбошиларини қуйидагилар билан тўлдириш таклиф этилмоқда:
- “— давлат рамзлари тасвирларини қўллашни тақиқлаш қўлланадиган маҳсулотлар (товарлар) рўйхати”.
- “Рўйхат Вазирлар Маҳкамаси томонидан белгиланади”.
Изоҳ (0)