Buyuk Britaniya 24-fevral kuni “Rossiya harbiy mashinasini qo‘llab-quvvatlagani” uchun Qirg‘izistonning “Keremet Bank”iga qarshi sanksiyalar qo‘lladi. Qirg‘izistonlik deputat Is’hak Masiyev bunga tanqidiy munosabat bildirdi.
Deputat Qirg‘iziston Tashqi ishlar vazirligiga murojaat qilib, sanksiyalarga munosabat berishni so‘radi.
Dunyo yomon tomonga o‘zgarmoqda, imperiyachilik ambitsiyalari yana jonlanmoqda. Buyuk Britaniya Qirg‘izistonning “Keremet Bank”iga qarshi sanksiyalar joriy etdi. Go‘yoki Rossiya bilan aloqalari bor emish. Unda ular Rossiyada ishlaydigan million nafar fuqaromizga nisbatan ham sanksiya qo‘llashi kerak edi, dedi Masiyev.
U Qirg‘iziston Buyuk Britaniya oldida tashqi siyosat va bank faoliyati bo‘yicha hech qanday majburiyatlarga ega emasligini ta’kidladi.
Biz Britaniyaning mustamlakasi emasmiz. Qirg‘iziston TIV bunga munosabat bildirishi kerak, deb hisoblayman, deya qo‘shimcha qildi deputat.
Britaniya sanksiyalari
London Rossiyaga qarshi 2022-yildan beri eng yirik sanksiyalar paketini e’lon qildi. Cheklovlar bir qator uchinchi mamlakatlarda, jumladan, Markaziy Osiyo davlatlari, Turkiya, Tailand, Hindiston va Xitoyda joylashgan stanoklar, elektronika va “Rossiya harbiylari uchun ikki maqsadli tovarlar” ishlab chiqaruvchilari va yetkazib beruvchilariga qaratilgan.
Qirg‘izistonning “Keremet Bank” banki ham Buyuk Britaniyaning yangi sanksiyalar ro‘yxatiga kiritildi.
Biz birinchi marta Rossiya harbiy mashinasini qo‘llab-quvvatlovchi xorijiy moliya institutlarini nishonga olish uchun yangi vakolatlardan foydalanmoqdamiz. Qirg‘izistonda joylashgan “Keremet Bank” OAJga nisbatan sanksiyalar kiritmoqdamiz, bu esa Rossiyaga o‘z harbiy harakatlarini qo‘llab-quvvatlash uchun xalqaro moliya tizimidan foydalanishiga to‘sqinlik qiladi, deyiladi Britaniya hukumati bayonotida.
AQSH ham “Keremet Bank”ka sanksiyalar qo‘llagan
15-yanvar kuni AQSH Moliya vazirligi “Keremet Bank”ni Rossiyaga qarshi joriy etilgan cheklovlarni chetlab o‘tishda ishtirok etgani uchun sanksiyalar ro‘yxatiga kiritgan edi. Vazirlik ma’lumotlariga ko‘ra, bank Rossiyaning mudofaa sanoatini moliyalashtiruvchi va 2022-yildan beri sanksiyalar ostida bo‘lgan Rossiyaning “Promsvyazbank”i bilan aloqada ishlagan.
Izoh (0)