Қирғизистонда депутат Достон Бекешев енгил наркотикларни қонунийлаштиришни таклиф қилди. У давлат гиёҳвандликка қарши кураш соҳасидаги сиёсатини қайта кўриб чиқиши ва баъзи енгилликлар бериши кераклигини айтди. Бу ҳақда Kloop хабар берди.
“Инсон заиф мавжудот. Агар у илгари спиртли ичимлик ва гиёҳванд моддаларни истеъмол қилган бўлса, бунга яна қайтиши мумкин. Аммо қаерда камроқ, қаерда кўпроқ зарар борлигини аниқлаш лозим. Синтетик гиёҳванд моддалар жуда катта ёвузликдир. 19 ёшли қиз-йигитларнинг клубларда гиёҳванд моддаларни истеъмол қилиши жуда ачинарли ҳолат”, деди Бекешев.
Депутат “ҳаммани ноқонуний майдонга ҳайдаш” ўрнига енгил гиёҳванд моддаларнинг ҳеч бўлмаганда бир турини қонунийлаштириш таклифини берди. У бу ривожланган мамлакатларда ҳам қўлланилиши, тўлиқ тақиқлаш кутилган натижани бермаслигини айтди.
“Афсуски, биз бунга фақат қамоққа олишлар, узоқ вақт ва бузилган тақдирлар орқали эришамиз, деб ўйлайман. Агар сиз аллақачон бу масалани ўрганишга киришган бўлсангиз, жуда яхши бўларди. Синтетик моддаларга келсак, тўлиқ қўшиламан — уларга қарши курашиш керак”, дея хулоса қилди депутат.
Парламентда кучли таъсир қилувчи моддаларга қарши курашни кучайтиришни назарда тутувчи бир қатор кодекс ва қонунларга тузатишлар киритиш тўғрисидаги қонун лойиҳаси муҳокама қилинди. Гап наркотиклар рўйхатига киритилмаган психоактив моддалар, шунингдек, психотроп моддалар, уларнинг аналоглари ва прекурсорлари ҳақида бормоқда.
Ҳужжат муаллифи Медер Алиевга кўра, 2023 йилнинг ўзида Қирғизистон психиатрия ва наркология марказига кучли таъсир қилувчи дори воситаларини истеъмол қилгандан сўнг тиббий ёрдам сўраб 854 та мурожаат келиб тушган. Уларнинг 68 таси 14 ёшгача бўлган ўсмирларга тегишли бўлган. У “дорихона гиёҳвандлиги”ни хавотирли тенденция деб атаган.
Изоҳ (0)