Хитойлик вирусологлар кўршапалакларда COVID-19 каби одамларга юқиши мумкин бўлган янги коронавирус турини аниқлади. Бу ҳақда South China Morning Post хабар берди.
Таъкидланишича, ушбу вирус HКU5 коронавирусининг янги тури бўлиб, дастлаб Гонконгдаги япон кўршапалагида топилган. Хитой Фанлар академиясининг Гуанчжоудаги бўлими, Ухан университети ва Ухан вирусология институти мутахассислари Гуанчжоудаги лабораторияда тадқиқот олиб борган.
Вирусологлар кўршапалак намуналаридан ажратиб олинган янги вирус инсон ҳужайраларини зарарлаши мумкинлигини таъкидламоқда.
Олимлар ҳозирча хавотирланишга сабаб йўқлигини билдирган. HКU5-CoV-2 нинг одамлар орасида тарқалиш хавфини бўрттириб кўрсатмаслик керак, бироқ бу борада янада чуқурроқ тадқиқотлар ўтказиш зарур, дейди улар.
АҚШ конгрессменлари COVID-19 Ухандаги лабораторияда яратилганини айтди
Улар 2 йиллик текширув натижасида коронавирус лабораториядан тарқалганига оид далиллар келтирди. Вирус биологик хусусиятларга эга, COVID бозорда тарқалишидан олдин лаборатория ходимлари касалликка чалинган, дейди конгрессменлар.
Уларга кўра, вирус табиатда аниқланмаган биологик хусусиятларга эга, COVID-19 нинг барча ҳолатларида вирус инсон организмига бир марта кириши натижасида юзага келган. Гарчи олдинги пандемияларда бир нечта тарқалиш манбалари кузатилган.
Бундан ташқари, Уханда САРС вирусларини ўрганиш бўйича етакчи тадқиқот лабораторияси мавжуд. Конгрессменлар муассаса “биологик хавфсизлик даражаси етарли бўлмаган” тадқиқотлар тарихига эгалигини айтмоқда.
Олимлар эса коронавирус бозордан тарқалганини айтмоқда
АҚШ, Буюк Британия, Франция ва бошқа мамлакатлардан бир гуруҳ олимлар коронавирус тарқалишининг манбайи Хитойнинг Ухан шаҳридаги денгиз маҳсулотлари бозори эканини айтганди. 12 миллиондан ортиқ аҳолига эга Уханда 4 та тирик ҳайвонлар бозори фаолият юритади. Улар орасида Хуанан бозори энг кўп ёввойи ҳайвонлар сотиладиган жой ҳисобланади.
Олимлар бозорда 2019 йилнинг кузида бир неча еноцимон итлар, бамбук каламушлар, малай жайралари, Амур типратиканлари ва Осиё бўрсиқлари каби тирик ҳайвонларни ноқонуний сотилганини айтмоқда. Ёввойи ҳайвон сотувчиларнинг аксарияти бозорнинг ғарбий қисмида жойлашган, айнан шу ерда COVID-19 билан касалланишнинг энг дастлабки ва кўп ҳолатлари кузатилган.
Изоҳ (0)