Говард Картер томонидан Тутанхамон қабри топилганидан кейин бир асрдан кўпроқ вақт ўтгач, археологлар яна бир топилмани — Қадимги Мисрнинг XVIII сулоласи ҳукмдорларидан бири бўлган подшо Тутмос II нинг сўнгги қароргоҳини топишга муваффақ бўлди.
Доктор Пирс Литeрланд бошчилигидаги Британия–Миср жамоаси томонидан топилган қабр Шоҳлар водийси деб аталадиган ҳудуднинг ғарбий қисмида, Луксор яқинида жойлашган. Шу пайтгача Тутмос II нинг дастлабки қабри қаерда экани номаълум эди. Унинг мумиёланган қолдиқлари икки юз йил олдин Хацҳепсут мақбара-ибодатхонаси устидаги Дайр ал-Баҳри номли яширин ҳудуддан топилган.
Мисрнинг Туризм ва қадимий ёдгорликлар вазирлиги ушбу топилма сўнгги йиллардаги энг муҳим археологик кашфиётлардан бири бўлганини маълум қилди.
Тутмос II мақбараси
2022 йилда илк бор кашф этилган қабр дастлаб қадимги Мисрда ҳукмронлик қилган Тутмос номли фиръавнлар сулоласининг маликаларидан бирига тегишли деб тахмин қилинган. Бироқ, кейинчалик археологик топилмалар бу қабрда милоддан аввалги 1479 йилда нисбатан қисқа муддатли ҳукмронликдан сўнг вафот этган Тутмос II дафн этилганлигини исботлади.
Тадқиқот натижаларига кўра, Тутмос II тахминан 30 ёшида вафот этган, ундан кейин тахтга унинг рафиқаси Хацҳепсут ўтирган. У тахминан 21 йил, милоддан аввалги 1479 йилдан 1458 йилгача ҳукмронлик қилган.
Мақбара ичидан нималар топилди?
Мақбара ичидан археологлар шоҳона мақбара белгиларини, хусусан, фиръавнларга мўлжалланган қадимий дафн матни “Амдуата”дан битиклар, Тутмос II ва Хацҳепсут номлари ўйилган алебастр кўзаларнинг парчалари, шунингдек, кўк рангга бўялган ва сариқ юлдузлар билан безатилган шифтни аниқлади.
Бироқ мақбаранинг ўзи бутунлай бўш бўлиб, жуда ачинарли аҳволда. Талон-тарож қилинган кўплаб қадимий қабрлардан фарқли ўлароқ, ушбу сағана махсус тозалаб чиқилган. Тадқиқотчиларнинг фикрича, бу иш қабр шаршара остида қурилгани сабабли кучли сув тошқинидан зарар кўрганидан кейин амалга оширилган.
Дастлабки текширувлар мақбаранинг дастлабки таркиби қадимги даврларда сув тошқинидан сўнг бошқа жойга кўчирилганини кўрсатмоқда, дейилади расмийлар баёнотида.
Доктор Пирс Литeрленднинг айтишича, жамоа бу ҳудуд тўғрисида кўпроқ ўрганиш ва мақбаранинг дастлабки таркиби сақланаётган жойни аниқлаш учун ўз ишини давом эттиради.
Изоҳ (0)