Қирғизистонлик собиқ депутат Эмиль Жамғирчиев 2022 йилнинг декабрь ойида ноқонуний тарзда Ўзбекистонга ўтиб, Тошкентга келиб, Салимбой номи билан танилган тадбиркор Салим Абдувалиевдан ёрдам сўраганди. Қирғизистон президенти Садир Жапаров “Кабар”га берган интервьюсида айрим тафсилотлар ҳақида маълумот берди.
Садир Жапаров воқеадан хабардор бўлганини маълум қилди. Қирғизистон президентига берилган маълумотларга кўра, халқ депутати Қирғизистон-Ўзбекистон давлат чегарасини ноқонуний кесиб ўтган.
“У Салимбой лақабли криминал авторитет Салим Абдувалиев билан учрашиб, ‘икки дўст’ни йўқ қилишга ёрдам беришни сўраган. Тегишли факт бўйича терговни Миллий хавфсизлик давлат қўмитаси ходимлари Ўзбекистон махсус хизматлари билан биргаликда олиб борган. Натижа қандай бўлиши мени хавотирлантирмаганди”, — деди Қирғизистон президенти.
Kaktus.media нашрининг таъкидлашича, қирғизистонликлар мамлакат президенти Садир Жапаров ва Миллий хавфсизлик давлат қўмитаси раҳбари Қамчибек Ташиевни “икки дўст” деб аташади.
Эмиль Жамғирчиев Қирғизистон Республикаси Жиноят кодексининг 378-моддаси 1-қисми (Қирғизистон Республикаси давлат чегарасини ноқонуний кесиб ўтиш)да назарда тутилган жиноятни содир этганликда гумон қилинмоқда. Парламент уни жиноий жавобгарликка тортишга рози бўлган.
Йиғилишда Миллий хавфсизлик давлат қўмитаси раиси Қамчибек Ташиев Эмиль Жамғирчиев чегарани ноқонуний кесиб ўтиб, ўзбекистонлик криминал авторитет Салимбой билан учрашганини айтган. Аммо махсус хизматлар раҳбари Жамғирчиевни қамамасликка ваъда берган.
Қамчибек Ташиев таъкидлашича, Жамғирчиев Салимбойга бир қанча мактуб ёзиб, Қирғизистон расмийлари ўртасида ўзаро низо кучайганини айтган.
“Салимбой Эмиль Жамғирчиев унинг олдига келганини тасдиқлади. У Қирғизистон расмийлари ўртасида низолар кўпайганини айтиб, Салимбойдан тартиб ўрнатиш учун ёрдам сўраган. Бироқ Салимбой Қирғизистондаги ишларга аралаша олмаслигини айтган. Бизнинг депутат Салимбойдан ёрдам сўрабгина ортига қайтмасдан, унинг ёрдамчисини ҳам алдаган.
Бир неча кун меҳмонхонада тунаб, пулини тўламай қочиб кетган. Шу сабабли Ўзбекистонда Жамғирчиевга нисбатан фирибгарлик ва давлат чегарасини ноқонуний кесиб ўтиш моддалари билан жиноят иши қўзғатилган”, — деди Миллий хавфсизлик давлат қўмитаси раҳбари Жогорку Кенеш йиғилишида.
Тергов маълумотларига кўра, Жамғирчиев Жогорку Кенешнинг еттита ҳужжатини Ўзбекистондаги танишига топширган. Лекин бу ҳужжатлар нима ҳақда эканлиги номаълум.
Маълумот учун, Эмиль Жамғирчиев Қирғизистонда жиноий иш юзасидан масалани ижобий ҳал этиш учун тадбиркордан пора олганликда айбланиб, қўлга олинган. Қирғизистонлик собиқ депутат 2023 йилнинг февраль ойида Ўзбекистонда қидирувга берилган.
Эслатиб ўтамиз, 2023 йилнинг 5 декабрь куни Салимбой номи билан танилган Салим Абдувалиев Ўзбекистон Жиноят кодексининг 248-моддаси 1-қисми билан (ўқотар қуролни қонунга хилоф равишда сақлаш) гумон қилинувчи тарзда жалб этилиб, процессуал тартибда ушланган.
Изоҳ (0)