Иссиқкўлдаги кўчмас мулклар хорижликларга сотилади. Қонун лойиҳаси Қирғизистоннинг Жогорку Кенеш депутатлари томонидан маъқулланди. Бу ҳақда 24.kg хабар берди.
Хорижий фуқароларга мулкчилик шаклидан ва тадбиркорлик фаолиятининг ҳуқуқий шаклидан қатъи назар, Иссиқкўлнинг биосфера ҳудудида жойлашган, дам олиш хизматларини кўрсатувчи пансионатлар, дам олиш масканлари, уйлар, коттежлар ва бошқа объектларни сотиб олишга рухсат берилади. Парламентда кўплаб баҳс-мунозараларга сабаб бўлган қонун лойиҳаси Жогорку Кенеш томонидан учинчи ўқишда қабул қилинди.
Ҳужжат муаллифи депутат Балбак Тулобоевнинг таъкидлашича, амалдаги қонунчиликка асосан хорижликлар сармоявий жозибадор бўлган рекреация объектларига эгалик қила олмайди.
Шу билан бирга, инновацион курорт, дам олиш масканларини қуриш, замон билан ҳамнафас бўладиган принципиал жиҳатдан янги инфратузилмани яратиш зарурати мавжуд.
Буни аҳолининг туризм хизматларига бўлган эҳтиёжларини қондира оладиган, даромад келтирувчи ва янги иш ўринлари ярата оладиган юқори рентабелли ҳамда рақобатбардош туризм индустриясини шакллантириш орқали амалга ошириш мумкин.
Ўз навбатида, бу Иссиқкўл курорт-рекреацион зонасини ривожлантиришга, жумладан, хорижий инвестицияларни жалб қилиш билан бевосита боғлиқдир.
Қирғизистон Иссиқкўлдаги пансионатларни ўзбекистонлик инвесторларга бермоқчи
2023 йил Қирғизистон Вазирлар Маҳкамаси ҳузуридаги Давлат мулкини бошқариш давлат агентлиги директори Канатбек Турғунбеков Иссиқкўлдаги собиқ “Дилором” пансионати ўзбекистонлик инвесторларга фойдаланишга топширилиши мумкинлигини айтганди.
“Дилором” (Эне-Сай), “Олтин қум” (Бостери) ва “Роҳат” (Алтин-Жай) пансионатларимизга сармоя жалб қилиш масаласи бор. Яъни улар сармоя киритади ва бошқаради, — деганди Турғунбеков.
Қирғизистон томони ҳар бир пансионат учун 15-20 млн доллар миқдорида сармоя киритишни кутмоқда. Бундан ташқари Озарбайжон билан Иссиқкўл қирғоғида 5 юлдузли меҳмонхона қуриш режаси ҳам бор.
Ўзбекистоннинг Иссиқкўлдаги собиқ пансионатлари
2016 йилда Темир Сариев бошчилигидаги Қирғизистон ҳукумати Иссиқкўлда Ўзбекистонга тегишли бўлган тўртта: “Роҳат-NBU” (кейинчалик (Алтин-Жай деб ўзгартирилди), “Олтин қум” (кейинчалик Бостери), “Дилором” (кейинчалик Эне-сай) ва Бўстон (номи сақланиб қолган) пансионатларини миллийлаштиришга қарор қилди.
Ўзбекистон ҳолат юзасидан АҚШдаги халқаро арбитражга даъво аризаси берди. Тошкент қирғиз томонини собиқ СССР давлатлари ўртасида Иттифоқ парчаланганидан кейин бошқа республика ҳудудида қолиб кетган объектлардан фойдаланиш бўйича 1992 йилда имзоланган келишувни бузган, деб ҳисоблайди.
2023 йилнинг май ойида суд Қирғизистон томони 40 миллион доллардан ортиқ пул тўлаши керак, деган қарорга келган. Биз Ўзбекистон томони билан музокаралар олиб бордик ва объектларни 49 йилга ижарага беришга, уларни тўрт-беш юлдузли меҳмонхоналар даражасига кўтаришлари бўйича келишиб олдик: уларга белгиланган суммани тўлашга имконимиз йўқ, — деганди Қирғизистон президенти Садир Жапаров.
Изоҳ (0)