Қирғизистонда мопед, скутер ва двигатель ўрнатилган велосипедларнинг пиёдалар йўлида ҳаракатланишини тақиқлашни таклиф этилди. Парламент аъзоси Чингиз Ажибоев “Йўл ҳаракати тўғрисида”ги қонунга ўзгартиш киритишни илгари сурди.
Ҳужжат жамоатчилик муҳокамасига тақдим этилган. Ўзгартиришлардан мақсад йўл ҳаракати хавфсизлигини таъминлашдан иборат. Ташаббускорнинг сўзларига кўра, қонунчиликдаги бўшлиқлар туфайли велосипед ва мопед ҳайдовчилари кўпинча “йўлдаги ўз мажбуриятларини билмайди”. Бу хавфли вазиятларга олиб келади, деб ҳисоблайди Ажибаев.
“Сўнгги вақтларда ушбу транспорт воситалари иштирокида содир бўлаётган йўл-транспорт ҳодисалари сонининг кўпайиши кузатилмоқда, бу ҳайдовчилар ва пиёдалар хавфсизлигига таҳдид солмоқда”, дейилади ҳужжатда.
Депутат якка тартибдаги ҳаракатланиш воситалари ҳайдовчиларига, агар ёнма-ён махсус ажратилган йўлакча мавжуд бўлса, қатнов ва пиёдалар йўлагида ҳаракатланишни тақиқлашни таклиф этмоқда. Шунингдек, рулни камида бир қўл билан бошқариш мажбурий бўлади.
Бундан ташқари, қонун лойиҳаси ҳайдовчиларга шлем, тирсак ва тизза ҳимояси тақиб юришни мажбурий этиб белгилайди. Агар улар йўловчиларни ташиса, улар ҳам шу тарзда “таъминланган” бўлиши шарт. Худди шундай талаблар юк ташишга ҳам тааллуқлидир.
Сентябрь ойида халқ депутати Чингиз Ажибаев Бишкекда махсус инфратузилма яратилмагунча мопед ва самокатлардан фойдаланишни тақиқлашни таклиф қилганди.
Изоҳ (0)