Қирғизистонда педофилларни фақат умрбодга қамаш таклиф қилинди

Қирғизистонда депутат Марлен Маматалиев педофилларга фақат умрбод қамоқ жазосини беришни таклиф қилди. Бу ҳақда 24.kg хабар берди.

 

Депутат қонун лойиҳасини Жўқорғи Кенешнинг Конституциявий қонунчилик, ҳукумат тузилмаси, суд-ҳуқуқ масалалари ва норматив-ҳуқуқий ҳужжатлар бўйича парламент қўмитасида тақдим этди. Халқ депутатига кўра, амалдаги қонунчиликда болаларнинг жинсий дахлсизлигига қарши жиноятлар учун 15 йил ёки умрбод қамоқ жазоси назарда тутилган. У 15 йиллик жазони бекор қилишни таклиф қилмоқда.

“60 ёшдан ошган эркаклар умрбод қамоқ жазосига тортилмайди. Биз ушбу қоидани ҳам олиб ташлашни таклиф қиламиз. Давлат ҳисобидан турмада сақланса ҳам бу жиноятчилар бизнинг еримизда юришга ҳаққи йўқ! Улар қамоқда чириши керак!”, – деди Марлен Маматалиев.

Унинг ҳамкасби Гуля Кожокулова қонун лойиҳасига қарши чиқди. Парламентарийнинг сўзларига кўра, у зўрлаганларни ҳимоя қилмайди, лекин ҳар бир ҳолат алоҳида кўриб чиқилиши керак, шунинг учун қонунларда муқобил вариант кўзда тутилган. У ҳаммани бир хил жазолаб бўлмаслигини айтди. Лойиҳага Бош прокуратура ҳам қарши чиқди.

Муҳокама якунида қўмита аъзолари кўпчилик овоз билан қонун лойиҳасининг концепциясини маъқуллади.