Россия президенти Владимир Путин Россия гази учун тўловлар энди муайян бир банк орқали ҳисоб-китоб қилинмаслигини назарда тутувчи фармонни имзолади. Тегишли ҳужжат Ҳуқуқий ахборот расмий порталида эълон қилинди.
Илгари бундай ягона молиявий институт икки ҳафта олдин АҚШ санкцияларига учраган “Газпромбанк” эди. Шу туфайли Путин 2022 йил 31 мартдаги ўз фармонига ўзгартириш киритди. Ўша фармонда “Газпромбанк”ка Россия гази учун тўловларни қабул қилувчи ягона муассаса бўлиш ваколати берилганди.
Бундай молиявий операцияларни амалга ошириш учун чет эллик харидорлар махсус рубль ва валюта ҳисобварақларини очишлари керак бўлган. Санкциялар киритилгандан сўнг, ушбу ҳисобварақлар ўз-ўзидан долзарблигини йўқотади.
Путиннинг янги фармонида чет эл компанияси газ учун тўловни “учинчи шахслар” орқали амалга ошира олиши таъкидланган.
Энди газ учун тўлов мажбуриятларини нафақат пул билан, балки “ўзаро қарзларни ҳисобга олиш” орқали ҳам бажариш мумкин бўлади, деб ёзмоқда Тҳе Белл нашри.
АҚШ Россиянинг 50 та банки, жумладан, “Газпромбанк”га қарши санкциялар киритди
21 ноябрь куни АҚШнинг янги санкциялар пакетига Россиянинг 50 дан ортиқ банки, 40 та қимматли қоғозлар рўйхатга олувчиси ва молия соҳасига алоқадор 15 нафар амалдор кирди. Улар орасида Буюк Британия, Канада, Австралия ва Янги Зеландиянинг худди шундай рўйхатларида аллақачон мавжуд бўлган “Газпромбанк” ҳам бор.
UnionPay карталари ишлашни тўхтатди
Ўша куннинг ўзида “Газпромбанк” хориждаги UnionPay карта эгаларини “қийинчиликлар” ҳақида огоҳлантирди ва уларга “яқин вақт ичида нақд пул ечиб олиш”ни маслаҳат берди. Хусусан, “Газпромбанк” томонидан чиқарилган UnionPay тизими карталари камида саккизта мамлакатда: Туркия, БАА, Таиланд, Венгрия, Германия, Қатар, Қозоғистон ва Хитойда ишламай қолди. Италия, Уругвай, Аргентина ва Индонезияда ҳам карта эгалари муаммоларга дуч келди.
“Газпромбанк”нинг ўзи бу карталарни расмийлаштириш ва чиқаришни тўхтатди. “Коммерсант” газетасининг маълумотларига кўра, банк ўз веб-сайтида UnionPay карталарини расмийлаштириш мумкин бўлганлар рўйхатдан олиб ташлаган.
Изоҳ (0)