Муҳаббатнинг кўзи кўр: Голливуд юлдузларининг изтиробли севги ҳикоялари

Муҳаббат фожиаларга олиб келиши, инсон тақдирини пароканда қилиши мумкин. Қуйидаги муҳаббат қиссалари бунинг ёрқин далилидир.

Жон Леннон ва Ёко Оно

Америкалик хонанда ва бастакор, Тҳе Beatлес гуруҳининг собиқ аъзоси Пол Маккартни бир куни Жон Леннонни нотаниш япон рассоми Ёконинг авангард кўргазмасига жўнатади. Бундай санъатдан бехабар Леннон кўрган ҳамма нарсаларини бемаъни деб баҳолайди. Бундай муносабат мағрур рассом аёлни қаттиқ ғазаблантирди ва... уни севиб қолади. Кўп ўтмай, Жон машҳур мусиқачи ва қўшиқчига ошиқ бўлиб қолган жўшқин ва шиддаткор япон аёлининг таъқибларига дуч келди.

Ёко соатлаб Ленноннинг уйи олдида ўтирар, унинг чиқишини пойлар, унга тинимсиз қўнғироқ қиларди. Мусиқачига дўқ-пўписа билан хатлар ёзар, унинг оиласини ҳар хил гаплар билан таҳқирлар эди. Бир куни Жон тўсатдан ўзи ҳам ўжар япон аёлига бефарқ эмаслигини билиб қолади. Леннон ўзини Ёко билан руҳан яқин ҳис этади. Маълум бўлишича, уларнинг қизиқишлари бир хил ва иккаласининг ҳам замонавий жамиятга бўлган қарашлари мос келарди.

Муҳаббат Жон билан Ёкони худди том маънода бошқа шахсга айлантиради. Улар ҳамма вақт бирга бўлишар, бир-бирларидан бир дақиқа ҳам ажралишмасди. Эҳтимол, машҳур квартетнинг тез орада тарқалиб кетишига Леннондаги жўшқин эҳтирос сабаб бўлгандир. Аммо Жон ҳеч нарсани эшитишни истамасди, у муҳаббатдан кўр бўлиб қолган ва севимли аёлнинг ёнида бўлишдан завқланиб яшарди, то мухлисининг машъум отишмасига қадар.

Вивен Ли ва Лоуренс Оливиэ

Британия театр ва кино актёрларининг энг машҳур жуфтлиги мамлакатнинг пуритан қонунларини бузиб, жамоатчилик фикрига қарши чиқади. Уларнинг иккаласи ҳам оилали эди, лекин бу ҳол Вивен Ли билан Лоуренс Оливенинг севишишларига халал бермайди. Вивен ёлғон билан яшамаслик учун Times журналига берган очиқ интервьюсида у шахсий муносабатлари ҳақида тўғрисини айтади.

Вивен ва Лоуренснинг никоҳи актёр жуфтликлар орасида энг бахтлиси ҳисобланган. Бироқ томошабинлар юлдузлар оиласида аслида нима бўлаётганини билишмасди. Вивен эрини ҳурмат қиларди ва сёмкалар сабаб у билан бўлолмаслиги депрессия хуружлари билан якунланарди. Турган гапки, бу оилавий ҳаётга оғир таъсир қилади.

Бир куни Лоуренс чидаёлмайди: 17 йиллик биргаликдаги ҳаётдан сўнг у Вивенни ташлаб кетади. Бу вақтга келиб, актриса оғир касаликка чалинган ва севгилисидан айрилиш фожиани янада тезлаштирган эди. Машҳур Скарлетт 1967 йилнинг ёзида ўпка силидан вафот этади. У умрининг охиригача фақат битта одамни — Лоуренс Оливьени севиб ўтади.

Киану Ривз ва Женнифер Сайм

Улар муҳаббат ва ҳамжиҳатликда узоқ ва бахтли яшашни орзу қилишарди. Лекин Киану ва Женнифернинг бошига оғир мусибат тушади: туғуруқдан бир ҳафта олдин ҳали она қорнидалигидаёқ қизи вафот этади. Албатта, буни бошдан кечириш ниҳоятда оғир эди.

Киану бир амаллаб ўзини қўлга олади, аммо Женнифер азобда қолади. Қизини йўқотиш дардини босиш учун у ичкилик ва гиёҳванд моддалардан тасалли излайди. Ҳаммаси фожиали якунланади: бир йил ўтгач, Женнифер автоҳалокатда вафот этади. Киану севган аёлининг хотирасини ҳанузгача қалбида сақлайди, лекин бу ҳақда ҳеч қаерда ва ҳеч кимга оғиз очмайди.

Элизабет Тейлор ва Ричард Бартон

Элизабет ва Ричарднинг муҳаббати Достоевскийнинг “Ака-ука Карамазовлар” асарида тасвирланган эҳтиросларга ўхшарди. Ақлданозар даражадаги ҳис-туйғулар, кутилмаган хатти-ҳаракатлар... Улар бир-бирларига ошиқ-у беқарор бўлиб, гўё оиланинг мавжудлигини, уларнинг хатти-ҳаракатларини ёқтирмайдиган Голливуд жамиятининг фикрини унутиб қўйишганди.

Ричард Бартон Элизабет Тейлор билан учрашишдан олдин актриса Сибил Уоллесга уйланган ва икки фарзанди бор эди. Элизабет эса қўшиқчи Эдди Фишер билан турмуш қурганди. Ҳаммаси Тейлор Миср маликаси ролини ўйнаган ва Бартон унинг партнёри бўлган “Клеопатра” фильмини суратга олишдан бошланади. Тақдир тақозоси билан унга Клеопатрага телбаларча ошиқ бўлган ва унинг учун ўлимга рози бўлган Марк Антоний роли насиб этади.

Улар атайлаб севги оловида ёнаётгандек эдилар: жанжаллар, айрилиқлар, муштлашувлар. Ҳар бир жанжалдан кейин Ричард Бартон ярашиш белгиси сифатида Элизабетга бриллиантлар совға қиларди. У бағрикенг, сахий, шу билан бирга, ниҳоятда қизиққон ва тажовузкор эркак эди. Элизабет ҳам унга муносиб эди. Бундай муносабатлар узоқ давом этиши мумкин эмасди...

Икки марта айрилиқ ва икки қайта никоҳдан сўнг, улар охир-оқибат бир умрга ажралишади. Ричард Бартоннинг ўлими ҳақидаги хабар Элизабет учун даҳшатли зарба бўлади. У бирдан ундан-да яқинроқ ва севиклироқ эркак аслида ҳеч қачон бўлмаганини тушунди.

Женнифер Энистон ва Бред Питт

Севгилиси билан етти йил биргаликдаги ҳаётдан сўнг Энистон оиладаги ўз ўрнини бошқа аёлга бўшатиб беришга мажбур бўлди. Фильмларда кўринадиган кучли, жасур Бред эса Анжелина Жолининг жозибасига заррача қаршилик кўрсатолмайди. Айтишларича, у ҳатто Энистон пиширган гўштдан воз кечиб, вегетариан бўлиб қолган экан.

Женнифер бу зарбадан ўзини ўнглаб олишга қанчалик уринмасин, унинг хатти-ҳаракатларида фақат битта одамни — Бред Питтни севган олдинги пайтлардаги қайғу-ҳасрат сезилиб туради. Шу сабабли бўлса керак, актрисанинг шахсий ҳаётида ҳамон омади юришмаяпти: у ҳозирча кўнглидаги эркакни учратгани йўқ. Дарвоқе, Бред ҳам Анжелина билан оилавий бахт топа олмади: тақдир ундан қасос олгандек, ҳозирда собиқ рафиқаси билан судлашиб юрибди.

Мариён Котияр ва Жюлен Рассам

Мариён — жаҳон киносининг энг мафтункор актрисаларидан бири, “Оскар” мукофоти совриндори. Зиёли, меҳрибон, ақлли қиз юксак муҳаббат ҳақида ҳикоя қилувчи романларни кўп ўқирди, бу туйғу учун одамлар баъзан ўзларини қурбон қилиб, олижаноб ишлар қилишади. Кўп ўтмай у ўз шаҳзодаси Жюлен Рассам билан учрашади. Тўғри, Мариённинг танишлари ва дўстлари уни бу муҳаббат яхшилик келтирмаслигидан огоҳлантиришганди. Жюлен истеъдодли актёр бўлса-да, руҳий хасталик ва гиёҳвандликка мойилликдан азият чекарди.

Мариён ўзининг фидокорона муҳаббати билан севгилисини қутқаришга, унда ҳаётга бўлган қизиқишни уйғотишга ҳаракат қилади. Аммо ҳаммаси беҳуда кетади. Ўз жонига қасд қилишга мойил бўлган Жюлен бир куни унинг кўз ўнгида ўзини деразадан ташлайди. У ҳалок бўлмайди, лекин бир умрга ногиронлар аравачасига михланиб қолади. Мариён яна севгилисига меҳрибонлик билан ғамхўрлик қилади, мўжиза юз беришига ва ҳаммаси яхши томонга ўзгаришига умид қилади ва ишонади. Бироқ икки йилдан сўнг Жюлен барибир жонига қасд қилади...

Унинг ўлими Мариённи шунчалик ларзага соладики, у узоқ вақт давомида оилавий бахтни озгина бўлса ҳам эслатувчи вазиятлардан қочиб юрди. Кейинчалик Котияр Гиём Каньега турмушга чиқди ва ҳозирда уларнинг икки фарзанди бор.