Қирғизистон пойтахти Бишкекда картошка нархи бир килограмм учун 60-65 сомгача (салкам 9-10 минг сўмга яқин) кўтарилди. Мамлакат Қишлоқ хўжалиги вазирлиги картошка экспортини вақтинчалик чекламоқчи. Бу ҳақда 24.кг хабар берди.
Депутат Элдар Абакиров Сув ресурслари, қишлоқ хўжалиги ва қайта ишлаш саноати вазирлигидан ерга ишлов бериш мавсуми ва келгуси йил учун режалари ҳақида маълумот беришни сўради.
“Бизда картошка катта ҳудудларда — Иссиқкўл вилояти, Олой, Чон-Олой, Қўчқорда етиштирилади. Фермерлар учун хурсандмиз, лекин аҳоли учун 65 сом қиммат. Бир қоп ун 1 минг 700 сом бўлса, бир қоп картошка 2,5-3 минг сом”, деди депутат.
Сув ресурслари, қишлоқ хўжалиги ва қайта ишлаш саноати вазирлиги картошка экспортига вақтинчалик чеклов жорий этиш масаласини кўриб чиқмоқда. Бу ижтимоий аҳамиятга эга маҳсулотлар нархининг спекуляциясига йўл қўймаслик ва озиқ-овқат хавфсизлигини таъминлаш имконини беради.
Вазир Бакит Торобоев мамлакатда озиқ-овқат нархлари бўйича ўтказилган йиғилишда давлат идоралари, президентнинг вилоятлардаги ўринбосарлари ва маҳаллий ҳокимият органларига озиқ-овқат маҳсулотлари нархини диққат билан кузатиш бўйича топшириқ берди.
Изоҳ (0)