Украинага қарши урушда қатнашган камида 48 минг нафар россиялик бедарак йўқолган. Бу ҳақда Россия мудофаа вазири ўринбосари Анна Сивилева Давлат Думасидаги давра суҳбатида маълум қилди.
Россия ҳарбий хизматчиларининг жасадларини аниқлаш учун уларнинг қариндошлари томонидан 48 минг ДНК тести ўтказилди, деди Сивилева.
Унинг сўзларига кўра, бу одамларни топиш ва шахсини аниқлаш учун қариндошларидан ДНК “мутлақо текин” олинади.
Давра суҳбатида иштирок этган Давлат думаси Мудофаа қўмитаси раҳбари Андрей Картаполов депутатлардан бедарак йўқолганлар сонини ҳеч қаерда айтмасликни сўради.
“Бу махфий ва жуда нозик маълумотлар. Якуний ҳужжатларни тузаётганимизда ҳам, бу рақамлар ҳеч қаерда тарқалмаслиги керак”, деди у.
Сивилева шундан сўнг аниқлик киритишга шошилди:
“Мен бедарак йўқолганларнинг эмас, бизга мурожаатларнинг сонини бердим. Бу кўрсаткич статистика эмас, шунчаки сўровлардир”.
- Сивилева Россия президенти Владимир Путиннинг амакиваччаси ва энергетика вазири Сергей Сивилевнинг рафиқаси. У АҚШ ва Европа иттифоқининг санкциялар рўйхатига киритилган.
Аввалроқ Россия вилоятлари Украинадаги урушда ҳалок бўлган иштирокчиларнинг жасадларини аниқлаш учун махсус воситаларни оммавий равишда сотиб олишни бошлагани маълум бўлганди.
“Вёрстка” нашрининг қайд этишича, жорий йилнинг январидан ноябрь ойининг ўрталарига қадар бунинг учун жами 182,9 миллион рубль (тахм. 2 млн доллар) ажратилган, бу 2023 йилга нисбатан деярли икки баравар кўпдир.
Пентагон маълумотларига кўра, ноябрь ойига келиб Россиянинг Украинадаги умумий йўқотишлари 615 минг кишини ташкил этган: 115 минг киши ҳалок бўлган ва 500 минг киши жароҳатланган. Июнь ойида Путин Украина армиясининг йўқотишларини эълон қилиб, уларни Россия билан солиштирди. Унинг сўзларига кўра, 27 ойлик уруш давомида Россия 135 мингга яқин одамни йўқотган.
Шу билан бирга, Медиазона ва BBC қўшма тадқиқотида ноябрда уруш бошланганидан бери 80 973 нафар россиялик ҳарбий ҳалок бўлганини тасдиқлашга муваффақ бўлди.
Буюк Британия Мудофаа вазирлиги Россия армиясининг умумий йўқотишларини 610 минг кишига баҳолаган, улардан 200 минг киши ҳалок бўлган ва 400 минг киши жароҳатланган.
Изоҳ (0)