Салимбой билан учрашган қирғизистонлик депутат судга олиб келинди 

Жогорку Кенеш депутати Эмил Жамғирчиев 24 январь куни Бишкекнинг Первомайский туман судига келтирилди. Бу ҳақда “АКИпресс” хабар берди.

Ўзбекистон билан чегарани ноқонуний кесиб ўтганлик учун Бош прокуратура томонидан қўзғатилган жиноят иши доирасида унга нисбатан эҳтиёт чораси танланиши мумкин. 10 январь куни Қирғизистон парламенти Бош прокурорга Жамғирчиевни жиноий жавобгарликка тортишга розилик берди.

Шунингдек, Миллий хавфсизлик давлат қўмитаси раҳбари Қамчибек Ташиевнинг сўзларига кўра, Ўзбекистонда депутатга нисбатан икки иш қўзғатилган: давлат чегарасини ноқонуний кесиб ўтиш ва фирибгарлик фактлари бўйича. Ташиев Жамғирчиев чегарани ноқонуний кесиб ўтиб, ўзбекистонлик криминал авторитет Салимбой билан учрашганини айтган. 

“Салимбой Эмил Жамғирчиев унинг олдига келганини тасдиқлади. У Қирғизистон расмийлари ўртасида низолар кўпайганини айтиб, Салимбойдан тартиб ўрнатиш учун ёрдам сўраган. Бироқ Салимбой Қирғизистондаги ишларга аралаша олмаслигини айтган. Бизнинг депутат Салимбойдан ёрдам сўрабгина ортига қайтмасдан, унинг ёрдамчисини ҳам алдаган.

Бир неча кун меҳмонхонада тунаб, пулини тўламай қочиб кетган. Шу сабабли Ўзбекистонда Жамғирчиевга нисбатан фирибгарлик ва давлат чегарасини ноқонуний кесиб ўтиш моддалари билан жиноят иши қўзғатилган”, — деди Миллий хавфсизлик давлат қўмитаси раҳбари Жогорку Кенеш йиғилишида. 

Тергов маълумотларига кўра, Жамғирчиев Жогорку Кенешнинг еттита ҳужжатини Ўзбекистондаги танишига топширган. Лекин бу ҳужжатлар нима ҳақда эканлиги номаълум. 

Ўз навбатида, Қирғизистон президенти депутат Салимбойдан “икки дўст”ни йўқ қилишни сўраганини айтган.

У Салимбой лақабли криминал авторитет Салим Абдувалиев билан учрашиб, “икки дўст”ни йўқ қилишга ёрдам беришни сўраган. Тегишли факт бўйича терговни Миллий хавфсизлик давлат қўмитаси ходимлари Ўзбекистон махсус хизматлари билан биргаликда олиб борган. Натижа қандай бўлиши мени хавотирга солмаганди, — дейди Қирғизистон президенти.

Кактус.медиа нашрининг таъкидлашича, қирғизистонликлар мамлакат президенти Садир Жапаров ва Миллий хавфсизлик давлат қўмитаси раҳбари Қамчибек Ташиевни “икки дўст” деб аташади.