Қирғизистонда депутат Медер Алиев Меҳнат кодексига аномал иссиқлик вақтида иш вақтини қисқартириш бўйича норма киритишни таклиф қилди. Бу ҳақда “АКИпресс” хабар берди.
У халқаро амалиётда Меҳнат кодексларида аномал иссиқда иш берувчи қулай шароит яратиши, яъни иш кунини қисқартириши кераклиги бўйича норма борлигини айтди.
Бизнинг кодексимизда шундай норма борми?, дея сўради у парламент эшитувларида.
Меҳнат, ижтимоий таъминот ва миграция вазирининг биринчи ўринбосари Мухторбек Баймурзаев жорий таҳрирдаги ва таклиф этилаётган лойиҳада бундай норма йўқлигини айтди.
Мутлақо йўқми? Ёки, эҳтимол, қандайдир билвосита шаклда бирор модда борми?, деб сўради Медер Алиев.
Меҳнат қонунчилигини назорат қилиш ва текшириш хизмати директори Чолпонқул Мадяров Меҳнат кодексида иш берувчи ўз ходимларининг хавфсиз меҳнат шароитларини таъминлаши кераклиги белгилангани ҳақида жавоб берди.
Икки йил олдин аномал иссиқ пайтида Соғлиқни сақлаш вазирлиги бундай ҳолларда иш берувчи ходимларни ичимлик суви билан таъминлаши кераклиги тўғрисида буйруқ чиқарганди. 50 ёшдан ошган ходимлар учун иш куни 1 соатга қисқартирилганди. Бу буйруқ асосида амалга оширилган. Аммо Меҳнат кодексида бу кўзда тутилмаган, деди у.
Алиев бу нормани киритишни тавсия этди.
Бу норма Россия ва Қозоғистонда мавжуд. У ерда аниқ ва равшан кўрсатилган. Дастлаб бу масала жиддий эмасдек туюлиши мумкин, бироқ у кекса ёшдаги, юрак-қон томир тизими касалликлари бор маълум тоифадаги фуқароларни қамраб олади, деди у.
Изоҳ (0)