Кремль Европанинг Украинада ўз ҳарбийларини жойлаштириш режалари ҳақидаги барча хабарларни диққат билан кузатмоқда ва улар хавотир уйғотмоқда. Бу ҳақда Россия президенти матбуот котиби Дмитрий Песков брифингда маълум қилди.
Песков, шунингдек, бу борадаги баёнотлар баъзан бир-бирига зид эканини таъкидлади.
Аввалроқ Британиянинг Тhе Daily Telegraph нашри Ғарб расмийларига таяниб, Украинанинг Европадаги иттифоқчилари Вашингтонга у ерга Европа давлатларидан қарийб 30 минг нафар ҳарбийни жойлаштиришни таклиф қилмоқчи экани ҳақида хабар берган эди.
Биз бу хабарларнинг барчасини, шунингдек, европаликларнинг бу борадаги баъзан бир-бирига зид бўлган расмий баёнотларини диққат билан кузатиб борамиз. Бу бизни хавотирга солмоқда, чунки гап ҳарбий контингентларни йўналтириш, НАТО мамлакатлари ҳарбий контингентларининг Украинадаги эҳтимолий эҳтимолий йўналиши ҳақида кетмоқда. Бу бизнинг хавфсизлигимиз нуқтаи назаридан бутунлай бошқача аҳамият касб этади. Шу сабабли ушбу мавзу биз учун муҳим, деди Кремль вакили.
Песков НАТО мамлакатлари ҳарбий контингентларининг Украина ҳудудида жойлаштирилиши Россия учун мақбул эмаслигини қўшимча қилди. Сиёсатчи бу ҳақда аввалроқ Россия ташқи ишлар вазири Сергей Лавров ҳам гапирганини эслатди.
Тhе Daily Telegraph хабарига кўра, ишлаб чиқилган таклифларни АҚШ президенти Дональд Трампга келаси ҳафта Вашингтонда Буюк Британия бош вазири Кир Стармер тақдим этади.
Буюк Британия ва Франция таклиф қилаётган режа Ғарб ҳарбийлари Украинанинг энг йирик шаҳарларида, жумладан Полтава, Днепропетровск ва Кривой Рогда, асосий портларда ва мамлакат учун муҳим инфратузилма объектларида, жумладан, АЭСда жойлаштирилишини назарда тутади.
Бу эса Россия ва НАТО давлатлари ҳарбийлари ўртасидаги тўғридан-тўғри қарама-қаршилик хавфини камайтиради. Контингент техник кузатув воситаларидан, жумладан, сунъий йўлдошлар, дронлар ва разведка самолётларидан, режага кўра, украиналик ҳарбийлар бўладиган тўқнашув чизиғидаги вазиятни кузатиш учун кенг фойдаланади, дейилади нашр хабарида.
Аввалроқ Стармер можарони ҳал қилиш учун Киев расмийларига хавфсизлик кафолати сифатида Украинага қўшин юборишга тайёрлигини маълум қилганди. Бироқ, у Европа ҳарбийларини мамлакатга жойлаштириш шарти сифатида АҚШ кафолатини кўрсатган. Унинг сўзларига кўра, уларсиз “Россияни тийиб туриш” бўйича ҳар қандай чоралар самарали бўлмайди.
Изоҳ (0)