Президентнинг ЖСТ масалалари бўйича вакили Азизбек Ўрунов ЖСТ Бош кенгашининг йиғилишидан олинган хулосалар билан бўлишди.
Унга кўра, ЖСТ аъзолари 2026 йил 26—29 март кунлари Камерунда бўлиб ўтадиган МC14 вазирлар конференциясида Ўзбекистонни янги аъзо сифатида кутиб олишга чақирган.
“Президент Шавкат Мирзиёев Ўзбекистонни ЖСТга олиб кирмоқда. Қўшилиш жараёни бошланган 31 йилдан сўнг тарихий қадамлар бугунга келиб сезиларли бўлиб бормоқда.
2025 йил 19 февралда бўлиб ўтган ЖСТ Бош кенгашининг 2-кун йиғилишидан шундай хулосага келиш мумкин.
Кун тартибининг 11-банди доирасида ЖСТ Бош директори 2024 йил якунлари бўйича аъзолик ҳолати тўғрисидаги ҳисоботни тақдим этди. 8 йиллик жимжитликдан сўнг Абу-Дабидаги МC13 вазирлар конференцияси давомида икки давлат Тимор-Лесте ва Комор ороллари ЖСТга аъзо бўлишди. Яна 22 давлат ЖСТга аъзо бўлиш жараёнига етакчилик қилмоқда.
ЖСТ бош директори сўнгги ўзгаришлар ва эришилган сезиларли ютуқларни инобатга олиб, Ўзбекистон, Босния ва Герсеговина ҳамда Эфиопиянинг аъзо бўлиш масаласига МC14 вазирлар конференциясининг бош мақсади сифатида эътибор қаратишни таклиф қилди. Мазкур тадбир 2026 йил 26—29 март кунлари Камерунда бўлиб ўтади. ЖСТнинг 26 аъзоси ушбу масала бўйича мурожаат қилишган.
Биз ЖСТнинг 16 аъзоси томонидан бир овоздан қўллаб-қувватланганимиздан жуда мамнун бўлдик, улар ЖСТга жалб қилинган барча аъзоларни жараённи якунлаш ва Ўзбекистонни МC14 конференцияси давомида янги аъзо сифатида кутиб олишга чақиришди.
Фурсатдан фойдаланиб, Аргентина, Бразилия, Боцвана, Хитой, Ҳиндистон, Индонезия, Корея, Малайзия, Покистон, Филиппин, Жанубий Африка, Туркия ва Буюк Британияга, МДҲ давлатлари – қардош Қозоғистон, Қирғизистон ва Тожикистонга ўз миннатдорчилигимни билдирмоқчиман.
Ўзбекистон Президент қўллаб-қувватлаши остида ўз халқи олдидаги мажбуриятларни бажариш, халқ ҳаётини яхшилаш, ҳамкорлари олдида муваффақиятлироқ бўлиш, Жаҳон савдо ташкилотига аъзо барча давлатлар кутилмаларини оқлаш ва дунёни янада интеграциялашган қилиш учун бу ерда бўлиб турибди.
Қарор қабул қилинган, 2026 йилга ҳам оз қолмоқда...” деб ёзди Ўрунов.
Аввалроқ Буюк Британия ҳам Ўзбекистоннинг Жаҳон савдо ташкилотига аъзо бўлиш жараёнини тўлиқ қўллаб-қувватлашини тасдиқлагани хабар қилинганди.
Учрашувларда Британия Ўзбекистонни Марказий Осиёдаги энг муҳим шерикларидан бири сифатида кўриши ва Тошкент билан ҳар томонлама алоқаларни янада жадаллаштиришдан манфаатдор эканлиги таъкидланди.
Ўзбекистонинг ЖСТга аъзо бўлиш жараёни қачин бошланганди?
Ўзбекистоннинг ЖСТга аъзо бўлиши бўйича жараён 1994 йил бошланган. 1998 йилда бу бўйича ишчи гуруҳ ташкил этилган эди. Кейинги йилларда ушбу ишчи гуруҳ фақат уч марта учрашди ва 2005 йилларнинг ўрталарига келиб бу борада халқаро экспертлар билан учрашувлар тўхтаб қолганди. Ўзбекистоннинг ЖСТга аъзо бўлиш жараёни 2020 йил июль ойида бўлиб ўтган ишчи гуруҳнинг тўртинчи йиғилиши билан расман қайта тикланди. Шундан сўнг 2022 йил июнь, 2023 йил март ва 2023 йил ноябрь ойларида яна учта учрашув бўлиб ўтди.
2023 йил сентябрида Шавкат Мирзиёев БМТ Бош ассамблеясининг 78-сессияси доирасида Жаҳон савдо ташкилоти (ЖСТ) бош директори Нгози Оконжо-Ивеала билан учрашув ўтказганди. Унда ЖСТ бош директори Ўзбекистон томонидан ташкилотга аъзо бўлиш борасида кўрилаётган чораларни юқори баҳолаган. Нгози Оконжо-Ивеала ЖСТ котибияти Ўзбекистоннинг саъй-ҳаракатларини тўлиқ қўллаб-қувватлашини айтган ҳамда мамлакат яқин келажакда ташкилотга қўшилишига ишонч билдирганди.
2024 йилнинг 5 июнь куни Ўзбекистонга ташриф буюрган Нгози Оконжо-Ивеала ЖСТга аъзолик қандай имкониятлар тақдим этишини айтиб ўтганди.
ЖСТга аъзолик Ўзбекистон корхоналарига янги бозорлар ва имкониятлар очади. Таркибий инфратузилмани яхшилаш ва Ўрта коридор билан боғланиш учун қилинган инвестициялар Ўзбекистонни дунё билан боғланган мамлакатлар қаторига қўшади. Бу логистикада рақобатбардошроқ бўлишга ёрдам беради. Ишонаманки, биз бунга эришамиз.
Ҳозиргидек макроиқтисодий рамкани жуда яхши бошқариш муҳим. Шунингдек, янги тармоқларни, янги иш ўринларини яратиш ва қиймат занжирини ривожлантириш учун афзалликлардан фойдаланиш зарур. Шу тариқа биз ёшларимиз учун бўш иш ўринларини яратишимиз мумкин, — деганди у.
Шунингдек, Нгози Оконжо-Ивеала сўнгги ўн йилликларда ЖСТга қўшилган мамлакатларда иқтисодий ўсиш кузатилаётганини таъкидлаб, ташкилот аъзолари дунё савдосининг 98 фоизини қамраб олишини маълум қилган.
ЖСТга аъзо бўлиш Ўзбекистонга нима беради?
“Жаҳон савдо ташкилотига аъзо бўлишдан оладиган энг биринчи манфаатимиз—иқтисодиётда корхоналар учун тенг шароит яратилишидир. Бу ўз навбатида рақобат муҳити яхшиланишига олиб келади ва бу иккинчи муҳим жиҳат — рақобат муҳити яратилишига олиб келади. Рақобатсиз ривожланиш қийин. Тез ривожланган давлатлар тажрибасига қаралса, уларда иқтисодий ўсишнинг асосий манбаларидан бири рақобат муҳити бўлган. Учинчидан, сифатли инвестициялар келади. Бу иқтисодиётнинг барқарор ўсиши учун муҳим омил”, деган эди Азиз Урунов ташкилотга аъзолик ҳақида “Дарё”га берган интервьюсида.
Унинг таъкидлашича, Ўзбекистон ушбу ташкилотга қўшилиш орқали оладиган тўртинчи энг муҳим фойда — савдо муносабатларида ЖСТ аъзолари билан бир тилда гаплашиш бўлади. Мамлакат ташқи бозорга очилади. Бу Ўзбекистоннинг нафақат ички бозори, балки ташқи бозорларни ҳам тадбиркорларга очилишига ёрдам беради. Глобал ишлаб чиқариш занжирига кириш учун катта имконият яратади.
Президент ёрдамчиси Саида Мирзиёева 2024 йилда мамлакат ЖСТга аъзо бўлиш йўналишда катта қадам ташлаганини таъкидлаган. Бу президент Шавкат Мирзиёев томонидан олиб борилаётган қатъий иқтисодий ислоҳотлар натижасида амалга ошгани эътироф этилган.
Хусусан, ўтган йили ЖСТ ишчи гуруҳи иккита муҳим йиғилиш ўтказди. Бу аъзоликнинг асосий ҳужжати — ишчи гуруҳ ҳисоботи лойиҳасини тайёрлашга киришишга имкон берди.
“ЖСТга аъзолик ва давлат раҳбари томонидан олиб борилаётган ислоҳотларнинг якуний мақсади, шубҳасиз, халқимиз фаровонлигини таъминлаш, унга муносиб иш ўринларини яратиш ва иқтисодиёт бошқарувини самаралироқ тизимга ўтказишдир”, деган эди Саида Мирзиёева.
Қисқа вақт ичида бизнесни ва рақобатни янада шаффоф қилиш учун 20 та муҳим қонун қабул қилинди. Саида Мирзиёеванинг қайд этишича, тез орада ташкилотнинг тўлақонли аъзоси бўлиш учун 2025 йилда ҳам Ўзбекистон шу суръатда давом этади. Бу мамлакатнинг инвестицион жозибадорлигини ошириши ҳамда ўзбек бизнесининг минтақавий ва глобал қўшилган қиймат занжирларига кириб боришини таъминлаши лозим.
Ўзбекистон 2026 йилгача Жаҳон савдо ташкилотига аъзо бўлмоқчи. Шавкат Мирзиёев Ўзбекистоннинг ушбу ташкилотга аъзо бўлиши чуқур ўйланган ва узоқни кўзлаган танлов эканлигини таъкидлаганди.
Изоҳ (0)