Қирғизистонда амалдорларнинг жазоларини монетизация қилиш режалаштирилмоқда. Бу ҳақда Президент ва Вазирлар Маҳкамаси қарорлари ижросини назорат қилиш бошқармаси бошлиғи Азамат Осмонов маълум қилди.
Маълум қилинишича, ҳайфсан тарзидаги интизомий жазо олиш амалдорга таъсир қилмаса, у мукофотдан маҳрум қилинади. Маоши эса кесиб ташланади. Бу мансабдор шахсни етарлича рағбатлантиради, чунки у моддий жиҳатдан чекланган бўлади. Ҳозирда Маъмурий ҳуқуқбузарликлар тўғрисидаги кодексга тегишли тузатишлар ишлаб чиқилмоқда.
“Биз фуқаролар мурожаатларининг сифати ва муддатларини бузганлик учун 100 ҳисоб-китоб кўрсаткичи (10 минг сом, салкам 1 миллион 479 минг сўм) миқдоридаги жазони жорий қилмоқчимиз. Бу ҳам фуқаролар мурожаатларини лозим даражада кўриб чиқмаган мансабдор шахсга нисбатан молиявий чекловларни келтириб чиқаради”, дейилади хабарда.
Аввалроқ Қирғизистон президенти Садир Жапаров интернетда ҳақорат ва туҳмат учун жарималар тўғрисидаги қонунни имзолаганди. Жарима миқдори жисмоний шахслар учун 20 минг сомгача, юридик шахслар учун 65 минг сомгача белгиланган. Бундан ташқари, эндиликда Қирғизистонда тўй ва дафн маросимларида ортиқча харажат қилганлар 100 минг сомдан 300 минг сомгача (салкам 15 миллион сўмдан 45 миллион сўмгача) жаримага тортилиши мумкин.
Ўз навбатида, Қирғизистонда депутат Миргул Темирбоева мактабларда пул йиғими учун жарима солишни таклиф қилмоқда. У президент Садир Жапаровнинг ноқонуний пул йиғиш ва жамоат фондларини ташкил этишни тақиқлашига қарамай, мактабларда пул йиғиш давом этаётганини айтган.
Янги моддага кўра, давлат умумтаълим ташкилотларида (1-синфдан 11-синфгача бўлган мактаблар) пул маблағларини қонунга хилоф равишда йиғиш жисмоний шахсларга 200 ҳисоб-китоб кўрсаткичи (20 минг сом — 3 миллион сўмдан зиёд) миқдорида жарима солишга сабаб бўлади.
Худди шундай ҳолат мактаблар қошида жамоат фондларини ташкил этиш йўли билан содир этилган бўлса, жисмоний шахсларга 400 ҳисоб-китоб кўрсаткичи (40 минг сом — 6 миллион сўмдан ортиқ), юридик шахсларга 600 ҳисоб-китоб кўрсаткичи (60 минг сом — 9 миллион сўмдан зиёд) миқдорида жарима солишга олиб келади.
Изоҳ (0)