АҚШ расмийлари Грузиянинг амалдорларига қарши санкциялар жорий қилди.
Қайд этилишича, рўйхатга Грузия Ички ишлар вазирлиги раҳбари Вахтанг Гомелаурининг номи киритилган бўлиб, у “тинч намойишларни бостириш”да иштирок этгани учун чекловларга дучор бўлган.
Бундан ташқари, чекловлар ички ишлар вазири ўринбосари Александр Дарахвелидзе, Тбилиси полиция бошқармаси бошлиғи Сулхан Тамазашвили, Ички ишлар вазирлигининг махсус топшириқлар бошқармаси бошлиғи, Грузия махсус кучлари раҳбари Звиад Харазишвили ва унинг ўринбосари Милери Лагазаурига ҳам тегишли.
Аввалроқ Буюк Британия ҳам Грузия ички ишлар вазири ва мамлакатдаги бир қанча амалдорларга қарши санкциялар жорий қилган эди.
18 декабрь куни АҚШ президенти Жо Байден бошчилигидаги АҚШнинг амалдаги маъмурияти ўз муддати тугагунга қадар Грузия расмийларига қарши қўшимча санкциялар жорий этиш ниятида эканлигини маълум қилган эди.
Грузия пойтахти Тбилисида 28 ноябрь куни тунда норозилиш намойишлари авж олди, унда мамлакат президенти Саломе Зурабишвили ҳам иштирок этди.
Тбилисидаги намойиш бош вазир Ираклий Кобохидзе ҳукмрон “Грузин орзуси — демократик Грузия” партияси 2028 йил охиригача Европа иттифоқига аъзо бўлиш бўйича музокараларни муҳокама қилмаслиги ва ҳамжамиятнинг барча бюджет грантларидан воз кечиш қароридан сўнг бошланган.
14 декабрь куни “Грузия орзуси” партиясидан номзод Михаил Кавелашвили Грузия президенти этиб сайланди. Марказий сайлов комиссияси маълумотларига кўра, у сайловчилар ҳайъати аъзоларининг 224 овозини қўлга киритди. Кавелашвили президентлик лавозимига ягона номзод бўлган.
Изоҳ (0)