Россияда қирғизистонлик мигрант Telegram’да Crocus теракти иштирокчилари ҳақида ёзган изоҳи ортидан уч йилга озодликдан маҳрум этилди. Бу ҳақда “ТАСС” хабар берди.
30 ёшли ноқонуний муҳожир Россия Жиноят кодексининг “Терроризмни амалга оширишга оммавий чақириқлар” моддаси бўйича уч йилга колонияга ҳукм қилинган. Telegram каналлардан бирининг изоҳида у шундай изоҳ қолдирган:
“Йигитлар, бундай ҳаракат учун жуда катта журъат керак, афсуски, улар қўлга тушди”, деб ёзган Қирғизистон фуқароси.
Суд мигрантга икки йил давомида сайтларни бошқаришни ҳам тақиқлаган ва у “жиноят содир этган” мобил телефон wса давлат даромадига мусодара қилинган. Мигрантни ҳибсга олиш чоғида олиб қўйилган телефон сим-картаси йўқ қилинади.
2024 йил ноябрь ойида қўлга олинган Қирғизистоннинг 30 ёшли фуқароси судда рус тилидан ўз она тилига таржимон талаб қилган. Судда маълум бўлишича, у ўз айбига тўлиқ иқрор бўлган, содир этган жиноятининг очилишига кўмаклашган ва қилмишидан пушаймон бўлган, бу эса унга нисбатан жазони енгиллаштирган.
Тарафлар баҳсида прокурор айбланувчига 4 йиллик озодликдан маҳрум қилиш жазосини тайинлашни сўради. Шу билан бирга, суд айбланувчининг қамоқда ўтказган даврини “кунма-кун” тамойили асосида жазо муддатига қўшиб ҳисоблади. Ҳукм ҳали қонуний кучга кирмаган, унинг устидан шикоят қилиш мумкин.
Crocus’даги теракт
22 март куни тунда Москва вилоятининг Красногорск шаҳридаги Crocus City Hall мажмуасида теракт содир этилди. Россия Тергов қўмитаси маълумотларига кўра, ҳодиса оқибатида ҳалок бўлганлар сони 145 нафарни ташкил этган. 550 дан ортиқ фуқаро яраланган. Теракт бўйича тергов доирасида ҳибсга олинганлар 20 нафарни ташкил қилмоқда. Терактга алоқадорликда айбланиб, бир неча Тожикистон фуқароси қўлга олинганди. ИШИДнинг Хуросон бўлими ҳужум учун жавобгарликни ўз зиммасига олган. Бироқ Россия махсус хизматлари Украинани ҳужумга алоқадорликда айблаган. Расман Украина терактга алоқадорлигини рад этади.
Изоҳ (0)