Rossiya Tashqi ishlar vazirligi Ukraina hukumatini rasman Crocus City Hall’dagi teraktda aybladi. Ukraina razvedkasi mazkur ayblovlarga javob qaytardi. Bu haqda BBC xabar berdi.
Rossiya ayblov yuzasidan Ukrainani teraktda ishtirok etgan shaxslarni zudlik bilan ekstraditsiya qilish, jabrlanganlarga yetkazilgan zararni qoplashga chaqirdi.
Bunday teraktlar qatorida vazirlik Darya Dugina va Vladlen Tatarskiyning o‘ldirilishi, Zaxar Prilepinga suiqasd uyushtirilgani, Qrim ko‘prigining portlatilishi, shuningdek, Rossiya ko‘ngillilar korpusining (Rossiya terrorchi tashkilot sifatida tan olingan) xatti-harakatlarini sanab o‘tdi.
Tashqi ishlar vazirligi bayonotida, bu voqealarning barchasi Crocus City Hall’ga qilingan hujum bilan bog‘langan.
Rossiya vakolatli organlari tomonidan o‘tkazilgan tergov harakatlari ushbu jinoyatlarning izlari Ukrainaga olib borishidan dalolat beradi, — deyiladi bayonotda.
Vazirlik hech qanday tafsilot va dalil keltirmagan, biroq Ukraina Xavfsizlik xizmati rahbari Vasiliy Malyukni hibsga olishni talab qilgan.
Ukraina xavfsizlik xizmati Rossiya Tashqi ishlar vazirligi bayonoti Buchada sodir etilgan vahshiyliklar fonida bema’ni ko‘rinishini aytdi.
Rossiya Tashqi ishlar vazirligining har qanday so‘zlari ahamiyatsiz. Rossiya haqiqatan ham e’tiborga loyiq faqat bitta bayonot berishi mumkin, ya’ni urushda mag‘lubiyatga uchragani va Ukraina tuprog‘idan okkupatsion qo‘shinlarini olib chiqishi haqida butun dunyoga e’lon qilish, — deyiladi xavfsizlik xizmati munosabatida.
Ukraina teraktga aloqadorligini rasman rad etadi. O‘z navbatida, ISHIDning Afg‘onistondagi bo‘limi “Viloyati Xuroson” ushbu hujum uchun javobgarlikni o‘z zimmasiga olishini bir necha bor ta’kidlagan.
G‘arb davlatlari, jumladan AQSH, Buyuk Britaniya va Germaniya boshidanoq Ukrainaning Crocus’dagi teraktga hech qanday aloqasi yo‘qligini ta’kidlagandi.
Izoh (0)