Москвадаги терактда жабрланганлар сони 360 нафарга етди

Москва яқинидаги Crocus City Hall биносига қилинган ҳужумда жабрланганлар сони 360 нафарга етди. Бу ҳақда “ТАСС” нашри хабар берди.

“Чоршанба куни тонгги ҳолатга кўра, теракт оқибатида 360 киши, жумладан, 11 бола жароҳатланган”, — дейилади соғлиқни сақлаш хизмати хабарида.

Шу пайтга қадар ҳужум оқибатида яраланган 92 киши касалхонага ётқизилгани айтилган. 63 киши эса шифохонадан чиқарилган. 205 нафар фуқаро амбулатор ёрдам олган.

Россия бош вазири ўринбосари Татьяна Голикова 26 март куни касалхоналарга жароҳатланганлар келиши давом этаётганини маълум қилган. Уларга барча зарур шарт-шароитлар яратиб берилаётгани таъкидлаб ўтилган.

Маълумот ўрнида, 22 март куни кечки пайт Москва яқинидаги Crocus City Hall савдо марказига террорчилик ҳужуми содир этилди. Ҳозиргача ҳужумда камида 139 киши ҳалок бўлгани айтилмоқда. Ҳужумда гумон қилинган 11 киши, жумладан, барча тўрт нафар қуролли шахс қўлга олинган. Улар Москванинг жануби-ғарбидаги Брянск вилоятида ҳибсга олинган. Гумонланувчилар яқин атрофдаги Украина чегарасини кесиб ўтиб, яширинишни мақсад қилган.

Россия президенти Владимир Путин ҳужумдан кейин эълон қилган халққа мурожаатида Crocus City Hall’га ҳужум ортида турганларнинг барчасини аниқлаш ва жазолашга ваъда берган эди.