Россия Тергов қўмитаси раҳбари Александр Бастрикин Москва вилоятидаги Crocus City Hall концерт залида содир этилган теракт оқибатида ҳалок бўлганлар сони 139 нафарга етганини айтди. Бу ҳақда Euronews хабар берди.
Шунингдек, оммавий қирғин оқибатида 182 киши турли оғирликдаги тан жароҳати олган.
25 март куни Москва суди теракт бўйича яна уч айбланувчини ҳибсга олди. Улардан бири Диловар Исломов террорчилар қочган оқ рангли Renault автомобилига эгалик қилган, қолган икки нафари унинг отаси Исроил Исломов ва укаси Аминхон Исломовлар эди. Александр Бастрикин таъкидлаганидек, Исломовлар оиласи босқинчиларга автомашинадан ташқари яшаш учун квартира берган, шунингдек, уларга пул ўтказиб берган.
24 март куни суд теракт содир этганликда гумон қилинган тўрт нафар шахс – Далержон Мирзоeв, Саидакрами Рачабализода, Муҳаммадсобир Файзов ва Шамсиддин Фаридуни ҳибсга олган эди. Улардан икки нафари айбини тан олган.
Давлат Думасидаги “Ягона Россия” фракцияси раҳбари Владимир Василев ўлим жазосига қўйилган мораторийни бекор қилиш масаласи “чуқур ўрганиб чиқилишини” айтган.
Теракт учун жавобгарликни дунёнинг кўплаб мамлакатларида террорчи деб тан олинган ИШИД ўз зиммасига олган, бироқ Москва уни Украина билан боғлашда давом этмоқда.
Қўшма Штатлар турли каналлар орқали Москвадаги терактда гўёки Киев изи йўқлигига, қонли теракт ИШИД томонидан амалга оширилганлигига ишонтиришга ҳаракат қилмоқда. Савол туғилади: Бундан кимга фойда? Бу фақат 2014 йилдан бери Киев режими қўллари билан биз билан курашаётганларга алоқадор бўлиши мумкин. Миллатчилар эса айниқса уларнинг қарши ҳужуми муваффақиятсизликка учраган пайтда энг ифлос усуллардан фойдаланишдан қайтмайди, — деди Россия президенти.
Изоҳ (0)