Тошкентнинг гавжум ҳудудларида автомобилларга тўхташга ёрдам берадиган автотураргоҳ ходимларини яхши биласиз. Уларни эгниларидаги “яшил жилет”дан танийсиз. Уларнинг аксарияти эшитиш ва нутқ қобилиятида муаммоси бўлган, йиллар давомида хуфиёна иқтисодиётда, яъни норасмий секторда шу тарзда тирикчилик қилиб келган фуқаролардир. Бироқ, уларнинг фаолияти назоратсиз бўлгани сабабли кўпинча тартибсизликка олиб келарди: автомобиллар икки қатор қилиб, йўлакларда, пиёдалар ўтиш жойлари яқинида ва яшил ҳудудларда қолдириларди. Буларнинг барчаси пиёдалар, атрофда яшовчилар ва бошқа ҳайдовчиларга ҳам жиддий ноқулайликлар туғдирарди.
Пойтахт Паркинг имконияти чекланган шахсларни ишга жойлаштириш бўйича янги ташаббусни амалга оширишга киришди. Биринчи босқичда эшитиш ва нутқ қобилияти чекланган 5 нафар ходим расмий равишда ишга қабул қилинди. Улар зарур тайёргарликдан ўтиб, барча керакли ҳужжатларни тақдим этдилар. Бу биринчи синов гуруҳи бўлиб, бунинг асосида эшитиш ва нутқ қобилияти чекланган шахсларни шаҳар паркинг тизимига интеграция қилиш модели синовдан ўтказилмоқда. Бундан ташқари, 10 кишидан иборат иккинчи гуруҳ ҳам шакллантирилиб, ҳозирда таълим олмоқда ва яқин кунларда ўзларининг расмий фаолиятларини бошлайдилар.
Интеграция жараёни
Мутахассислар билан ҳамкорликда қисқа муддатли таълим дастури ишлаб чиқилди. Ушбу вақт ичида иштирокчилар йўл ҳаракати қоидалари асослари, хулқ-атвор меъёрлари, автотураргоҳ ходимларининг вазифалари ва мажбуриятлари бўйича кўрсатмалар олдилар. Шунингдек, Пойтахт Паркинг мобил иловасидан фойдаланиш ва кутилмаган вазиятларда ҳайдовчилар билан муомала қилиш бўйича тренинг ўтказилди. Тренинг махсус малакага эга мутахассислар иштирокида ўтказилганлиги боис таълим жараёни самарали ўтди.
Шаҳар ва жамият манфаатлари учун
Шаҳар инфратузилмасига аҳолининг имконияти чекланган қатламини жалб қилиш шунчаки ижтимоий акция эмас. Бу шаҳар муҳитини тартибга солиш йўлидаги пухта ўйланган ва амалий қадамдир.
Бундай чора-тадбирлар қуйидагиларга имкон яратади:
- норасмий бандлик даражасини пасайтириш;
- шаҳар марказида тўхташ қоидаларини бузиш ҳолатларини камайтириш;
- қонуний иш ўринларини яратиш;
- илгари расмий иқтисодиётдан четда қолган гуруҳ билан барқарор муносабатларни ўрнатиш.
Пойтахт Паркинг паркинг маданиятини шакллантириш ва йўл ҳаракатининг барча иштирокчилари учун қулай шаҳар муҳитини яратиш бўйича тизимли ишларни давом эттирмоқда. Биз расмий бандликдан ташқарида қолганларнинг тақдирига бефарқ эмасмиз. Ҳар бир инсон ўз ўрнига эга бўлган кучли ва замонавий шаҳарнинг асоси — ҳурмат, дахлдорлик ва ўзаро ишонч эканига ишонамиз.
Реклама ҳуқуқи асосида
Изоҳ (0)