Катта еттилик давлатлари ташқи ишлар вазирлари Москва яқинидаги Crocus City Hall’да содир этилган терактга Украинанинг алоқадорлигини тан олишдан бош тортмоқда. Бу ҳақда “РИА Новости” хабар берди.
Аввалроқ Россия бош прокурори Игор Краснов Красногорскда содир этилган теракт ишида Украина изи яққол кўринаётгани, ҳуқуқ-тартибот идоралари ходимлари жиноят ташкилотчиларининг шахсини аниқлаш бўйича саъй-ҳаракатларни амалга ошираётганини маълум қилганди.
Биз Россия расмийларининг 22 март куни Москва яқинидаги фожиали терактда Украинани айблашга бўлган асоссиз уринишларини қатъиян рад этамиз, — дейилади Италиянинг Капри оролида бўлиб ўтган йиғилиш якунлари бўйича эълон қилинган G7 коммюникесида.
22 март куни Москва яқинидаги Красногорскда жойлашган Crocus City Hall концерт залида теракт содир бўлган эди: ҳужумчилар бинодаги одамларга қарата автоматлардан ўт очган. 145 киши ҳалок бўлган.
23 март куни Брянск вилоятида теракт содир этган тўрт нафар жиноятчи қўлга олинган. Россия президенти Владимир Путин улар қочишга уринганини ва Украина томон ҳаракат қилишганини айтган. Россия Хавфсизлик кенгаши котиби Николай Патрушевнинг таъкидлашича, тергов мазкур терактнинг бевосита айбдорлари ва Украина ўртасидаги алоқани тасдиқлаган ва процессуал жиҳатдан мустаҳкамлаган.
Тергов қўмитасига кўра, тергов Crocus’даги терактни амалга оширган жангариларнинг тайёргарлиги ҳақида муҳим маълумотларга эга бўлган, бу уларнинг Украина махсус хизматлари билан алоқаси борлигини исботлаши мумкин.
Изоҳ (0)