Рекорд сармоялар: гигант технологик компаниялар 2025 йилда сунъий интеллект учун 115 млрд доллар сарфлади

Meta, Microsoft, Amazon ва Alphabet (Google) каби технологик гигантлар сунъий интеллект (СИ) ривожига 2025 йил бошидан бери 155 миллиард доллардан ортиқ маблағ сарфлади. Бу рақам АҚШ ҳукумати томонидан 2025-молия йили давомида таълим, меҳнат ва ижтимоий хизматларга ажратилган маблағдан ҳам катта. Бу ҳақда The Guardian хабар берди.

Экспертлар фикрича, 2026 йилда бу рақам 400 миллиард доллардан ошиши кутилмоқда. Сўнгги икки ҳафта ичида йирик технологик компаниялар ўзларининг чораклик молиявий ҳисоботларини эълон қилди. Унда йил бошидан бери амалга оширилган капиталлаштирилган харажатлар (CапЕх) — яъни маълумот марказлари, сервер, чип ва бошқа инфраструктурага қилинган сармоялар кескин ошгани кўзга ташланмоқда. Жумладан:

• Meta — 30,7 миллиард доллар (2024 йилнинг шу даврида бу рақам 15,2 миллиард эди);
• Alphabet (Google) — 40 миллиард доллар;
• Amazon — 55,7 миллиард доллар;
• Microsoft эса фақат жорий чоракда 30 миллиард доллар сарфлашни режалаштирмоқда.

Microsoft молия директори Эйми Ҳуднинг айтишича, бу кўрсаткич 2024 йилги рекорд рақамдан (24,2 миллиард доллар) сезиларли даражада юқори бўлади.

Технология гигантлари 2026-молия йили учун янада улкан маблағлар сарфлашни режалаштирмоқда. Хусусан:

• Microsoft — 100 миллиард;
• Amazon — 100 миллиард;
• Alphabet — 85 миллиард (олдинги прогноз — 75 миллиард);
• Meta — 66–72 миллиард доллар оралиғида.

Шундай қилиб, ушбу тўртта йирик компаниянинг умумий сармояси 400 миллиард доллардан ошиши кутилмоқда. Бу эса Европа Иттифоқининг мудофаа учун ҳар чоракда ажратадиган бюджетидан ҳам юқори.

Бундай сармоялар инвесторларни қувонтирмоқда — Microsoft, Google ва Meta ўз харажатларини ошираётганини эълон қилгач, компания акциялари кескин кўтарилган. Жумладан, Microsoft’нинг капиталлашуви 4 триллион долларга етган.

Apple ҳам СИ пойгасига киришмоқда

Ҳозирча сунъий интеллект йўналишида рақобатчиларидан ортда қолаётган Apple ҳам харажатларини оширишни бошлаган. Компаниянинг чораклик CапЕх харажатлари 3,46 миллиард долларни ташкил этмоқда (2024 йили 2,15 миллиард эди). Компания расмийси Тим Кукнинг айтишича, Apple СИ бўйича фаолиятини кенгайтирмоқда ва ходимларнинг кўп қисми бу жараёнга жалб этилган.

“Сунъий интеллект стратегиямиз марказида — уни барча қурилмалар ва платформаларга чуқур интеграция қилиш ҳаркатидамиз”, деган у.