Ўзбекистон ва Қирғизистон фуқаролари ҳам Россияга киритилмаяпти — ОАВ

Марказий Осиёдан келган муҳожирлар масалалари билан шуғулланувчи ҳуқуқ ҳимоячиси Валентина Чупик Қирғизистон ва Ўзбекистон фуқаролари ҳам Россияга киритилмаётганини айтди. Илгари Тожикистондан келган муҳожирларга нисбатан ҳам худди шундай чоралар кўрилган.

Чупикнинг сўзларига кўра, сўнгги кунларда россиялик чегарачилар нафақат Тожикистон, балки Қирғизистон ва Ўзбекистон фуқароларига ҳам Россияга киришни оммавий равишда тақиқламоқда. Мигрантлар нафақат аэропортлардан, балки ерусти назорат пунктларидан ҳам қайтариб юборилмоқда.

“Муҳожирларни кириш чоғида оммавий ушлаш 24 апрелда бошланган ва 1 майга қадар Россия аэропортларида 4,5 мингга яқин одам тўпланган ва тахминан шунча одам ерусти назорат пунктларига киритилмаган.

Россияда бундай оммавий чиқариб юбориш ҳеч қачон кузатилмаган. Илгари бутун бошли самолётлар киритилмаган ҳолатлар бўлган, аммо бу ҳар ойда бир бўларди, энди эса ҳамма мигрантни орқага қайтаришмоқда”, —дейди ҳуқуқ ҳимоячиси.

Унинг таъкидлашича, аэропорт ёки ўтказиш пунктида ушлаб турилганлардан тўртдан бири Тожикистон фуқаролари, ярмига яқини Ўзбекистондан келган муҳожирлар, қолганлари эса асосан Қирғизистон фуқароларидир. 

“Одамлар озиқ-овқат, сув ва ҳеч қандай тушунтиришсиз тор хоналарда бир неча соат ушлаб турилиб, кейин ватанига жўнатилаётганидан шикоят қилмоқда. Баъзида депортация бир неча кун давом этиши мумкин”, — дейди Валентина Чупик.

Ҳуқуқ ҳимоячиси мўйловсиз, аммо соқолли эркаклар ва ҳижобли аёллар киритилмаётганини маълум қилди. 

Россияда Тожикистон фуқароларига нисбатан назорат 22 март куни Москва вилоятидаги Crocus City Hall да юз берган терактдан сўнг кучайди. “Пикник” гуруҳи концерти бошланишидан бир оз олдин автомат билан қуролланган тўрт киши концерт залига бостириб кирди. Улар аввалига одамларга қарата ўқ узди, кейин эса бинони ичкаридан ёқиб юборди.

Ҳужум оқибатида 140 дан ортиқ одам ҳалок бўлди, бир неча юз киши турли тан жароҳат ва талафотлар олди. Терактга алоқадорликда айбланиб, бир неча Тожикистон фуқароси қўлга олинди. ИШИДнинг Хуросон бўлими ҳужум учун жавобгарликни ўз зиммасига олди. Бироқ Россия махсус хизматлари Украинани ҳужумга алоқадорликда айблади. Расман Украина терактга алоқадорлигини рад этади.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.