Исроил армияси бош штаби раҳбари генерал-лейтенант Эёл Замир Ғазо секторида олиб борилаётган ҳарбий ҳаракатлар фақат гаровга олинганлар озод этилгандагина тўхтатилишини билдирди. Бу ҳақда Arab News хабар берди.
Маълум қилинишича, Исроил аскарлари қайтариб берилмаса, жанговар операциялар бир зумга ҳам тўхтамай давом этаверади.
“Фикрримча, яқин кунларда гаровга олинган ҳарбийларимизни озод этиш бўйича келишувга эришиш имкони бор-йўқлигини билиб оламиз. Агар бу амалга ошмаса — жанглар ҳеч қандай танаффуссиз давом этаверади”, деди Замир.
Замирга кўра, 2023 йилнинг октябридаги ҲАМАС ҳужумидан сўнг гаровга олинган 251 нафар яҳудий ҳарбийларининг 49 нафари ҳали ҳам Ғазода сақланмоқда. Уларнинг 27 нафари ҳалок бўлган деб тахмин қилинмоқда. Шу ҳафта фаластинлик қуролли гуруҳлар икки нафар гаровдагиларнинг “чўпдай” озиб кетган ҳолатини видеога олиб, интернетда намойиш этганди.
АҚШ, Миср ва Қатар воситачилигида олиб борилган тинчлик музокаралари ва гаровдагиларни озод қилиш бўйича саъй-ҳаракатлар июль ойида муваффақиятсиз якунлангач, Ғазода ҳарбий босимни кучайтириш янада авж олмоқда.
Исроил ҳукумати халқаро ва ички босим остида қолмоқда. Айниқса, гаровга олинганларнинг оила аъзолари сулҳга эришиш ҳаракатларини давом эттиришни талаб қилмоқда. Уруш 22 ойдан бери давом этиб келади.
Бу орада инсонпарварлик ташкилотлари Ғазода очарчилик мисли кўрилмаган даражага етганини, бу Исроил томонидан ёрдам етказишга қўйилган чекловлар оқибати эканини таъкидламоқда. Аммо генерал Замир бу даъволарни рад этиб, уларни “сохта, пухта режалаштирилган ва алдовга асосланган фикр” эканини айтган.
“Исроил мудофаа кучлари — бу ахлоқий армия. Уни уруш жиноятларида айблаш — қасддан ёлғон сўзлашга тенг”, деган у.
Замирнинг таъкидлашича, Ғазо секторида тинч аҳолининг ўлимига ҲАМАС’нинг ўзи жавобгар.
Маълумот учун, 2023 йил октябрь ойида ҲАМАС ҳужумлари оқибатида Исроилда 1 219 киши, асосан тинч аҳоли ҳалок бўлган. Уруш бошлангандан буён Ғазо секторига киритилган Исроил қўшинларидан эса 898 нафар ҳарбий ҳаётдан кўз юмган.
ҲАМАС назорати остидаги Ғазо соғлиқни сақлаш вазирлиги маълумотига кўра, Исроилнинг Ғазодаги ҳарбий амалиётлари оқибатида ҳозиргача 60 332 киши ҳалок бўлган. Уларнинг катта қисми тинч аҳоли бўлиб, бу рақам БМТ томонидан ишончли деб топилган.
Изоҳ (0)