Россия президенти Владимир Путин нима учун 143 киши ҳалок бўлган фожиа жойига, яъни Crocus City Hall'га ҳалигача бормаганинг сабаби айтилди. Бу ҳақда президент матбуот котиби Дмитрий Песковга таяниб, “ТАСС” хабар берди.
Песковнинг сўзларига кўра, Crocus City Hall'даги терактдан сўнг биринчи дақиқаларданоқ одамларни қутқариш ва ёрдам кўрсатиш бўйича барча чоралар кўрилган.
“Россия президенти Владимир Путин ходимлар ишига халақит бермаслик учун фожиа жойига келмади”, — деди Песков.
У терактнинг дастлабки дақиқалариданоқ Москва вилояти губернатори Андрей Воробёв бошчилигидаги барча тегишли хизматлар одамларни қутқариш, жабрланганларга тиббий ёрдам кўрсатиш ва ёнғинни ўчириш бўйича чоралар кўрганини айтди.
“Албатта, ҳозирда қандайдир танишув сафарларини ўтказиш мутлақо номақбул, чунки бу воқеа жойида ташкил этилган штаб-квартира ишига халақит беради”, — деб жавоб берди Кремль матбуот котиби.
Crocusъдаги теракт
Crocus City Hall'даги теракт 22 март куни кечқурун содир бўлди. Бир неча қуролланган киши концерт зали биносига бостириб кириб, оломонни отиб ташлаган, кейин эса бинони ёқиб юборган. Сўнгги маълумотларга кўра, теракт оқибатида143 киши ҳалок бўлган, 360 киши жароҳатланган. Ҳужумни содир этишда Тожикистоннинг тўрт нафар фуқароси айбланган, суд улар айбига иқрор бўлганини маълум қилган.
Мазкур ҳолатдан кейин Россияда мигрантларга нисбатан муносабат ўзгарган. Путин бошчилигида Россия расмийлари Украинани мазкур терактга алоқадорликда айблаган. Украина воқеага алоқадорлигини рад этган. Ғарб давлатлари, жумладан АҚШ, Буюк Британия ва Германия бошиданоқ Украинанинг Crocus терактига ҳеч қандай алоқаси йўқлигини таъкидлаган.
Москва вилоятидаги Crocus City Hall концерт залида уюштирилган оммавий қирғин учун жавобгарликни “ИШИД – Вилоят Хуросон” террорчилик гуруҳи ўз зиммасига олгани айтилмоқда. АҚШ Давлат департаменти мамлакат разведка хизматларига таяниб, бу иқрорни ҳақиқий деб ҳисоблаган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)