Москва вилоятидаги Crocus City Hall савдо мажмуасига уюштирилган теракт юзасидан тергов иши доирасида ҳибсга олинган шахслар сони 20 нафарга етди. Бу ҳақда Россия Федерал хавфсизлик хизмати берган ахборотга асосланиб, “ТАСС” нашри маълумот берди.
20 нафар гумонланувчи ҳибсда сақланаётгани ҳақидаги хабарни шахсан Россия Федерал хавфсизлик хизмати раиси Александр Бортников тасдиқлаган. Тергов жараёнида Қозоғистон, Қирғизистон, Тожикистон ва Ўзбекистондаги тегишли ташкилотлар билан ҳамкорлик қилинган.
“Биз ҳозирда бу ваҳшийликка алоқадор бўлганларнинг бутун тармоғини аниқлаяпмиз. 20 нафардан ортиқ одам ҳибсга олинган. Улар орасида бевосита айбдорлар ва уларга кўмаклашганлар бор”, — деган Александр Бортников жума куни Қирғизистон пойтахти Бишкек шаҳрида ўтказилган Мустақил давлатлар ҳамдўстлиги ташкилоти ҳузуридаги Миллий хавфсизликни таъминлаш органлари ва махсус хизматлар раҳбарлари кенгашининг ялпи йиғилишида.
Россия расмийси савдо марказига теракт уюштиришга тайёргарлик кўриш, шунингдек, уни молиялаштириш, террорчиларни ҳудудга жўнатиш каби тадбирлар бевосита ИШИД ташкилотининг Хуросон бўлими томонидан назорат қилинганини билдирган. Жиноятни содир этган 4 шахсдан икки нафари Туркия орқали Россияга кириб келган. Терактдан сўнг уларга Украина чегарасига бориш буюрилган.
Москвада айни пайтда теракт айбдорлари билан боғлиқ тергов давом этаётгани билдирилган.
Маълумот ўрнида, 22 март куни кечки пайт Москва вилоятининг Красногорск шаҳридаги Crocus City Hall мажмуасида теракт содир этилди. Россия Тергов қўмитаси маълумотларига кўра, ҳодиса оқибатида ҳалок бўлганлар сони 145 нафарни ташкил этган. 550 дан ортиқ фуқаро яраланган.
Изоҳ (0)