Австралиянинг Сидней шаҳрида пичоқ билан қуролланган эркак савдо марказида одамларга ҳужум қилди. Бу ҳақда Тhе Sydney Morning Herald хабар берди.
Ҳодиса 13 апрель куни Бонди Жанкшен районидаги Wеstfield савдо марказида содир бўлган. Гувоҳлар эркак “катта пичоқ” билан қуролланганини айтган. Ҳодиса оқибатида олти киши ҳалок бўлган, саккиз киши, жумладан, бир бола касалхонага ётқизилган.
Эркак полиция томонидан отиб ўлдирилган. Унинг мазкур ҳаракатлари сабаби ҳозирча номаълум, ҳуқуқ-тартибот идоралари унинг террорчилар билан алоқаси бор-йўқлигини текширмоқда. Ҳужумда эҳтимол яна бир киши иштирок этган бўлиши мумкин, аммо бу ҳақда расмий маълумотлар йўқ.
Эслатиб ўтамиз, 22 март куни Москва вилояти Crocus City Hall савдо марказида теракт содир бўлганди. Бир неча қуролланган киши концерт зали биносига бостириб кириб, оломонни отиб ташлаган, кейин эса бинони ёқиб юборган. Теракт оқибатида 143 киши ҳалок бўлган, юзлаб одамлар жароҳатланган. Ҳужумни содир этишда Тожикистоннинг тўрт нафар фуқароси айбланган, суд улар айбига иқрор бўлганини маълум қилган.
Мазкур ҳолатдан кейин Россияда мигрантларга нисбатан муносабат ўзгарган. Тожикистон президенти ҳужумни “шармандали ва даҳшатли воқеа” деб атаган ҳамда ота-оналарни фарзандлари тарбиясига жиддийроқ эътибор қаратишга чақирган.
Ўз навбатида, Россия терговчилари теракт иштирокчиларининг оиласини сўроқ қилиш учун Тожикистонга борган. Шундан кейин Ваҳдат шаҳрида яшовчи тўққиз нафар тожикистонлик Crocus’даги теракт ижрочилари билан алоқадорликда айбланиб, қўлга олинган. Ҳибсга олинганлар ИШИД билан алоқада бўлганликда ҳам гумон қилинмоқда.
Доғистонда ҳам аксилтеррор операция ўтказилиб, тўрт нафар Тожикистон фуқароси ушланган. Улар терактнинг асосий иштирокчиларини қурол ва пул билан таъминлагани айтилмоқда. Россия Ташқи ишлар вазирлиги Украина ҳукуматини расман Crocus City Hall’даги терактда айблаган. Украина расман мазкур айбловларни рад этган. Ўз навбатида, ИШИДнинг Афғонистондаги бўлими “Вилояти Хуросон” ушбу ҳужум учун жавобгарликни ўз зиммасига олишини бир неча бор таъкидлаган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)