Истанбул прокуратураси Crocus City Hall'да содир этилган терактга алоқадор беш нафар хорижликка 7,5 йилдан 15 йилгача қамоқ жазоси беришни талаб қилди. Бу ҳақда Anadolu ахборот агентлигига таяниб, “РИА Новости” хабар берди.
Туркияда қўлга олинган шахслар Crocus'даги теракт ижрочиларига кўрсатмалар бериб, уларга 800 минг рубль ва янги ҳужжатлар ваъда қилган. Гап Ҳофизжон Усмонов, Мутеулло Усоев, Раҳматулло Солиқов, Муҳаммадраҳим Файзов ва Ҳамза Муҳаммад ҳақида бормоқда. Улар теракт иштирокчилари Шамсиддин Фаридун ва Саидакрами Рачабализода билан алоқада бўлгани айтилмоқда. Туркияда қўлга олинганлардан бири Истанбулнинг Авжилар туманида Фаридуни билан квартирада яшаган.
Айбланувчилардан бирининг теракт ижрочилари билан ёзишмалари эълон қилинган. У топшириқни бажаришни — Вегас савдо марказига бомба жойлаштиришни таклиф этган. Тахминларга кўра, терактни амалга оширган шахс ёзишмаларда уни “ушлаб олишлари ва ўлдиришларидан” хавотир билдирган.
Йўқ, йўқ. Бомбани ўрнатганингиздан кейин бизнинг одамимиз сизни олиб кетади ва Беларусь чегарасигача олиб боради. У ерда сизга янги паспортлар беришади ва квартира билан таъминлашади, дейилади хабарда.
Истанбул Бош прокуратураси ҳибсга олинган хорижликлар учун етти ярим йилдан 15 йилгача қамоқ жазосини талаб қилмоқда.
22 март куни тунда Москва вилоятининг Красногорск шаҳридаги Crocus City Hall мажмуасида теракт содир этилди. Россия Тергов қўмитаси маълумотларига кўра, ҳодиса оқибатида ҳалок бўлганлар сони 145 нафарни ташкил этган. 550 дан ортиқ фуқаро яраланган. Теракт бўйича тергов доирасида ҳибсга олинганлар 20 нафарни ташкил қилмоқда. Терактга алоқадорликда айбланиб, бир неча Тожикистон фуқароси қўлга олинганди. ИШИДнинг Хуросон бўлими ҳужум учун жавобгарликни ўз зиммасига олган. Бироқ Россия махсус хизматлари Украинани ҳужумга алоқадорликда айблаган. Расман Украина терактга алоқадорлигини рад этади.
Изоҳ (0)