Тожикистон Ташқи ишлар вазирлиги 29 апрель куни Россия Федерациясининг Душанбедаги элчисига норозилик нотаси топширган. Бу ҳақда “РИА Новости” нашри хабар берди.
Манбада айтилишича, Тожикистон Ташқи ишлар вазирлиги Россия Федерацияси элчисига Россияда ўз фуқароларининг ҳуқуқлари бузилгани муносабати билан нота топширган. Россияда Тожикистон фуқароларига нисбатан “қатъий салбий муносабат намоён бўлиши”дан хавотир билдирган.
Олдинроқ Тожикистон расмийлари мамлакат фуқароларига мурожаат қилиб, зарур сабаб бўлмаса, Россияга бормай туришни тавсия қилган эди. Бу баёнот тожикистонликлар учун чегарани кесиб ўтишда қийинчиликлар юзага келаётгани билан изоҳланган.
Россия Ташқи ишлар вазирлиги расмий вакили Мария Захарова Тожикистон томонининг баёнотига ўз муносабатини билдирган. Захарованинг таъкидлашича, Россия ва Қозоғистоннинг қуруқликдаги чегараларини кесиб ўтишда тожик фуқаролар учун юзага келган қийинчиликлар Москвадаги Crocus City Hall терактидан кейин пайдо бўлган террористик таҳдиднинг кучайиши билан боғлиқ. Расмийлар уларни имкон қадар тезроқ ҳал қилиш учун кенг чора-тадбирлар режаси ишлаб чиқаётгани маълум қилинган.
Изоҳ (0)