Москва вилоятида жойлашган Crocus City Hall концерт залида содир бўлган терактдан сўнг бир қатор Европа давлатлари терроризм хавфи даражасини оширди, дея Euronews хабар берди.
25 март куни Туркияда ИШИД террорчилик ташкилотига алоқадорликда гумон қилинган 147 киши қўлга олингани ҳақида хабар берилган эди. Хабарга кўра, мамлакатда 2023 йилнинг 1 июнидан буён мазкур айблов билан 2900 дан ортиқ киши ҳибсга олинган.
Москва яқинида 22 мартда содир бўлган оммавий қирғиндан сўнг Италия Пасха арафасида терактларга тайёргарлик даражасини оширган. Ҳуқуқ-тартибот идоралари ходимлари 25 март куни Венецияда хавфсизлик протоколларини амалга оширишни бошлаган.
Аввалроқ Франция ҳукумати терактларга тайёргарликни энг юқори даражага кўтарганини айтган. Париждаги ёзги Олимпиада ўйинлари вақтида ҳам алоҳида эҳтиёт чоралари кўрилиши маълум қилинган. Бош вазир Габриэль Атталнинг айтишича, ҳуқуқ-тартибот идоралари ходимлари 2024 йил бошида ИШИД томонидан содир этилиши мумкин бўлган иккита терактнинг олдини олишга муваффақ бўлган.
Германияда террорчилик таҳдиди даражаси юқорилигича қолмоқда. Мамлакат уч ойдан камроқ вақт ичида бўлиб ўтадиган футбол бўйича Европа чемпионати вақтида содир бўлиши мумкин бўлган ҳужумларга тайёрлигини айтган.
Испания Миллий Хавфсизлик кенгаши ўзининг сўнгги аксилтеррор ҳисоботида Ғазо ва Украинадаги урушлар туфайли Европа Иттифоқи ҳақиқий ва бевосита хавфга дуч келиши ҳақида огоҳлантирган.
Изоҳ (0)