Россия ФВВ Красногорскдаги Crocus City Hall концерт залида содир этилган теракт қурбонлари сони 143 кишига етганини маълум қилди. Бу ҳақда Deutsche Welle хабар берди.
27 март куни Россия соғлиқни сақлаш вазири Михаил Мурашко 80 нафар жабрланувчи, жумладан, олти нафар бола даволанаётганини маълум қилган эди. Тўрт нафар беморнинг аҳволи ўта оғир, яна 19 нафари, жумладан, уч нафар боланинг аҳволи оғир. 34 нафар жабрланувчининг аҳволи ўртача оғирлигича қолмоқда, 23 нафарига тез орада касалхонадан чиқишга рухсат берилади.
27 март куни ФВВ ходимлари ёниб кетган марказ ўрнида вайроналарни тозалаш ишларини якунлаган, янги жасадлар энди қидирилмайди.
Аввалроқ База манбаси қурбонлар сони 144 нафарга етганини маълум қилган эди, у, шунингдек, 95 нафар киши бедарак йўқолгани ҳақида хабар қилган. Мазкур шахслар терактдан кейин қариндошлари билан алоқага чиқмаган, аммо қурбонлар ва ҳалок бўлганлар рўйхатида ҳам мавжуд эмас.
Crocus City Hallда террорчилик ҳужуми
Москва яқинидаги Красногорскдаги Crocus City Hall концерт залида теракт 22 март куни кечқурун содир бўлган, ўшанда бир гуруҳ киши концерт томошабинларига қарата ўт очиб, ёнғин чиқарган.
Россия Федерал хавфсизлик хизмати директори Александр Бортниковнинг айтишича, Крокусдаги терактдан сўнг 11 киши, жумладан, жиноятнинг тўғридан-тўғри иштирокчиси бўлган 4 киши қўлга олинган. Путин бошчилигида Россия расмийлари Украинани мазкур терактга алоқадорликда айблаган.
Украина воқеага алоқадорлигини рад этган. Ғарб давлатлари, жумладан АҚШ, Буюк Британия ва Германия бошиданоқ Украинанинг Crocus терактига ҳеч қандай алоқаси йўқлигини таъкидлаган.
Москва вилоятидаги Crocus City Hall концерт залида уюштирилган оммавий қирғин учун жавобгарликни “ИШИД – Вилоят Хуросон” террорчилик гуруҳи ўз зиммасига олгани ҳақида айтилмоқда. АҚШ Давлат департаменти мамлакат разведка хизматларига таяниб, бу иқрорни ҳақиқий деб ҳисоблаган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)