Москва вилоятидаги Crocus City Hall’да теракт уюштиришда гумон қилинган яна бир тожикистонлик — Ёқубжони Юсуфзода ҳибсга олинди. Бу ҳақда “Коммерсант” хабар берди. Москванинг Басманний туман суди 25 ёшли Юсуфзодани теракт иштирокчиларига ёрдам беришда айблаб, икки ойга ҳибсга олди.
Тожикистон фуқароси теракт уюштиришда айбланаётган шахсга ижарага олган квартира учун пул тўлашда ёрдам бергани айтилмоқда.
Яна камида беш кишининг жиноят содир этган шахсларга алоқадорлиги текширилмоқда. Улардан тўрт нафари Доғистондан олиб келинган. Мазкур шахслар теракт иштирокчиларини қурол, ўқ-дори ва пул билан таъминлагани гумон қилинмоқда, яна бир нафари Юсуфзода билан бирга қўлга олиниб, милицияга бўйсунмагани учун маъмурий жавобгарликка тортилган.
Суд терактда (Жиноят кодексининг 205-моддаси 3-қисми билан) айбланган Ёқубжони Юсуфзодани ҳибсга олиш масаласини ёпиқ эшиклар ортида кўрган. Суднинг очиқ қисмида журналистлар фақат Тожикистон фуқаросининг шахсий маълумотларини эшитган. Жумладан, у 25 ёшда экани, уч нафар ёш фарзандини тарбиялаётгани, қурилишда ноқонуний жисмоний меҳнат қилгани маълум бўлган.
Шунга қарамай, айбланувчи 22 март куни Crocus’да содир этилган терактда айбланаётган таниши Фаридуни Шамсидинга оз миқдорда пул юборган. Иккинчиси бу ва бошқа пулларни Красногорскда квартирани ижарага олиш учун ишлатган.
Юсуфзода 25 март куни дўсти Иноятулло Кенджаев билан қурилишдан қайтаётганида қўлга олинган. Бу вақтда пойтахт полицияси Crocus’даги теракт сабабли “Нолегал” операциясини ўтказган ва унинг доирасида тожикистонликларни текширишга қарор қилган.
Бироқ айбланувчилар патрул машинасини кўргач, “ҳаракат траекториясини ўзгартира бошлаган”, қадамларини тезлаштирган ва милиция ходимларининг тўхташ ҳақидаги талабларини эшитиб, қочишга уринган.
“Қўлга олиш чоғида иккаласи ҳам фаол қаршилик кўрсатган, шахсини тасдиқловчи ҳужжатларни тақдим этишдан бош тортган, шунингдек, полиция ходимларининг хизмат автомашиналарига чиқиш талабини бажармаган”, — дейди ҳуқуқ-тартибот ходимлари.
Итоатсизлик учун (Россия Маъмурий жавобгарлик тўғрисидаги кодексининг 19.3-моддаси 1-қисми билан) иккаласи ҳам Пресненский туман суди томонидан ҳибсга олинган: Юсуфзода - 12 суткага ва унинг ҳали ҳам текширилаётган дўсти 15 суткага.
Доғистонда ҳам Тожикистон фуқаролари қўлга олинди
Федерал хавфсизлик хизмати Махачқалъа ва Каспийскда ўтказилган аксилтеррор операцияси чоғида ҳибсга олинган тожикистонлик тўрт киши теракт иши бўйича айбланаётганини маълум қилди.
“Мен уларга, Москвадаги Crocus City Hall’га ҳужум қилган йигитларга қурол ташидим. Махачқалъадан Мйтишчигача. Уларга фақат молиявий ва қурол-яроғ билан ёрдам кўрсатдим”, — дейди ҳибсга олинганлардан бири сўроқ пайтида.
Тегишли видеоёзув ФХХ томонидан тарқатилган.
Терактда айбланаётганлар ҳужумдан бир оз олдин Renault автомашинасида қурол сотиб олиш учун Мйтишчи шаҳрига борган. Уларнинг ҳаракати уйлардан бирига ўрнатилган видеокамера томонидан ёзиб олинган.
Шу билан бирга, Доғистонда қўлга олинган шахс тинтув чоғида унинг хонадонидан иккита Калашников автомати ва 460 дона ўқ-дори топилгани ва пуллар телефонга уланган картага ўтказилганини тасдиқлади.
ФХХ “Доғистонда қўлга олинган, террорчилик гуруҳининг бир қисми бўлган тўрт нафар чет эл фуқароси Москвадаги Crocus City Hall концерт залида содир этилган терактни амалга оширувчиларни молиялаштириш ва террор воситалари билан таъминлашда бевосита иштирок этган, шунингдек, Каспийскдаги оммавий йиғилиш жойларида теракт тайёрланган”ини маълум қилди.
“Бомба Ғалаба боғида ёки Каспийск қирғоғида портлатилиши, шундан кейин улар Россияни тарк этиши керак эди”, — дейилади айбловда.
“Коммерсант”нинг ҳуқуқ-тартибот идораларидаги манбасига аниқлик киритишича, хавфсизлик кучлари Каспийскдаги иккита ва Махачқалъадаги учта манзилда операция ўтказган. Ҳибсга олинган тўрт кишининг барчаси Тожикистон фуқаролари. Улардан камида биттаси сўроқ пайтида Муҳаммадни (Crocus теракти айбдорларидан бири Муҳаммадсобир Файзов) билишини тасдиқлади.
Чет элликлар Доғистонда кафел терувчи бўлиб ишлаган. Терговнинг ҳибсга олинганларга нисбатан эҳтиёт чорасини танлаш ҳақидаги илтимослари катта эҳтимол билан Басманний туман судида кўриб чиқилади.
Изоҳ (0)