АҚШ махсус хизматлари Москвадаги Crocus City Hall концерт залига уюштирилган қуролли ҳужумга ўхшаш хорижий террорчилик ҳужумидан хавотирда. Бу ҳақда Федерал қидирув бюроси директори Кристофер Рэй маълум қилди.
Амалдор тегишли баёнотини Конгресс вакиллар палатасининг суд қўмитасида бўлиб ўтган эшитувда эълон қилган.
“Биз хориждан тайёрланаётган террористик ҳужум таҳдиди ва умуман олганда, Россиядаги концерт залида кўрганимизга ўхшаш мувофиқлаштирилган террорчилик ҳужуми эҳтимолидан тобора кўпроқ хавотирдамиз. Лекин бу сафар АҚШда (кузатилиши мумкин). 2001 йил 11 сентябрдаги терактлардан фарқли ўлароқ, биз хорижий террорчилик таҳдидида юмшоқ мақсадларга урғу берилаётганини кўриб турибмиз”, деди бюро директори.
Шунингдек, Кристофер Рэй террорчиларнинг эътиборини “оддий одамлар ҳаёт кечирадиган” жойлар жалб қилишини айтиб, АҚШга хориждан террорчилар кириб келганига ишонмаслигини билдирди.
Ҳозирда махсус хизмат ИШИД, “Ал-Қоида” ва мамлакатда фаолияти тақиқланган бошқа гуруҳлар фаолияти юзасидан суриштирув олиб бормоқда.
Маълумот ўрнида, 22 март куни тунда Москва вилоятининг Красногорск шаҳридаги Crocus City Hall мажмуасида теракт содир этилди. Россия Тергов қўмитаси маълумотларига кўра, ҳодиса оқибатида ҳалок бўлганлар сони 145 нафарни ташкил этган. 550 дан ортиқ фуқаро яраланган. Теракт бўйича тергов доирасида ҳибсга олинганлар 20 нафарни ташкил қилмоқда.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)