Россия Тергов қўмитаси Crocus City Hall’даги барча мигрантларни терактга алоқадорлигини текширмоқда. Baza Telegram каналига кўра, асосан Тожикистон, Қирғизистон, Ўзбекистон ва Туркманистон фуқаролари текширувдан ўтказилади.
Терговчиларга Crocus’да ишлаётган барча хорижликларни қайта сўроқ қилиш ҳақида кўрсатма берилган. Муҳожирларнинг Россияда қанча вақт бўлгани, қандай шароитда концерт залида ишга жойлашгани, патентларни қачон, қаерда ва қандай олгани, ким томонидан берилгани, рус тили ва Россия тарихидан тест топширган санаси ва жойини аниқлаш ҳам керак бўлади.
Манбага кўра, дастлабки сўроқ пайтида терговчилар Crocus’да ишлаган кўплаб хорижликлар мамлакатда ноқонуний бўлгани ва миграция қонунчилигини бузган ҳолда ҳужжатлар олганини аниқлаган. Москва вилоятидан мигрантларга хонадонини ижарага берган уй эгалари ҳам Тергов қўмитаси вакилларининг саволларига жавоб бериши керак бўлади. Улар квартирада қанча одам рўйхатга олингани ва яшаши ҳақида маълумот бериши лозим.
Таъкидланишича, Crocus City Hall концерт залида 25 нафар мигрант ишлайди ва улар текширувдан ўтказилади.
Изоҳ (0)