Тожикистон президенти Эмомали Раҳмон Москвадаги Crocus City Hallъда содир этилган терактни “шармандали ва даҳшатли” воқеа деб атади. Бу ҳақда республика раҳбари сайтида хабар берилди.
“Москва яқинида содир бўлган шармандали ва даҳшатли воқеа ҳар биримизни, айниқса, ота-оналарни фарзанд тарбиясига янада жиддийроқ эътибор қаратиш ҳақида яна бир бор огоҳлантирмоқда. Яна бир бор таъкидлайманки, биз ўсмирлар ва ёшларни ана шундай бузғунчи, ваҳимали гуруҳ ва ҳаракатлар таъсиридан асрашимиз, фарзандларимиз тожик миллатига, тожикларнинг суверен давлатига, уларнинг ота-оналарининг эзгу номига доғ туширишига йўл қўймаслигимиз керак”, – деди Эмомали Раҳмон.
24 март куни Тожикистон президенти россиялик ҳамкасби Владимир Путин билан телефон орқали мулоқот қилганди. У террор ҳужумида ҳалок бўлганларнинг оила аъзолари ва яқинларига ҳамдардлик ва таъзия билдирган.
Эмомали Раҳмон Crocus City Hall мажмуасида содир этилган шафқатсиз, қонли террорчилик ҳаракатини кескин қоралар экан, “террорчиларнинг миллати, ватани, дини йўқ” эканини таъкидлаган.
- Crocus City Hallъдаги теракт 22 март куни кечқурун содир бўлди. Бир неча қуролланган киши концерт зали биносига бостириб кириб, оломонни отиб ташлаган, кейин эса бинони ёқиб юборган. Теракт оқибатида 137 киши ҳалок бўлган, 182 киши жароҳатланган. Ҳужумни содир этишга Тожикистоннинг тўрт нафар фуқароси айбланган, улар айбига иқрор бўлган.
- Мазкур ҳолатдан кейин Россияда мигрантларга нисбатан муносабат ўзгарган, Россияга кириш ва чиқишни текшириш жараёни кучайди. Ҳолат юзасидан Қирғизистон Ташқи ишлар вазирилиги зарурат бўлмаса, Россияга ташриф буюрмасликни тавсия қилди.
Изоҳ (0)