AQSH Eron islom respublikasining kuzatuv va havo mudofaasi vositalari mavjudligiga qaramay, havo hududi ustidan to‘liq nazorat o‘rnatdi. Bu haqda AQSH prezidenti Donald Tramp o‘ziga tegishli Truth Social ijtimoiy tarmog‘ida ma`lum qildi.
“Hozirda Eron osmoni ustidan to‘liq va mutlaq nazoratga egamiz. Eronda yaxshi kuzatuv uskunalari va boshqa mudofaa texnikasi ko‘p miqdorda mavjud edi, ammo bular Amerika ishlanmalari va qurollari oldida hech narsaga arzimaydi. Hech kim buni qadimgi sodiq Amerikadan yaxshiroq qila olmaydi”, deya yozgan Amerika rahbari.
17-iyun kuni kunduzi Tramp Erondan taslim bo‘lishini kutayotganini e’lon qildi. U Eron va Isroil o‘rtasida o‘t ochishni to‘xtatishga intilmayotganini, mojaroning faqat Tehron yadroviy dasturlardan butunlay voz kechgan taqdirdagina yakunlanishi mumkinligini ta’kidladi.
Shuningdek, Amerika rahbari jurnalistlar bilan suhbatda Tehron kelishuv tuzishi kerak edi, biroq endi u muzokaralar olib borishga “kayfiyati yo‘qligini” aytgan.
Eron va Isroil o‘rtasidagi ziddiyat 13-iyun kuni keskin tus oldi. O‘shanda Isroil armiyasi Eron hududini keng miqyosda o‘qqa tutib, Eronning yadroviy obyektlari va yuqori martabali harbiylar pozitsiyalariga zarbalar bergan edi. Bunga javoban Eron Isroilni raketa va dronlar bilan o‘qqa tuta boshladi.
Bundan oldin, 2025 yil aprel oyidan boshlab Vashington va Tehron Eronning yadroviy muammosi bo‘yicha muzokaralar olib borgan edi. Amerika tomoni Tehronning yashirincha yadro qurolini yaratishi mumkinligini ta’kidlagan, ammo Eron bu ayblovlarni rad etgan. Isroil amaliyoti boshlanganidan so‘ng Maskatda rejalashtirilgan AQSH va Eron o‘rtasidagi muzokaralarning yangi bosqichi bekor qilindi.
Izoh (0)