AQSH 12-aprel kuni Eron bilan to‘g‘ridan-to‘g‘ri yadro dasturi bo‘yicha muzokaralarga kirishadi. AQSH prezidenti Donald Tramp agar kelishuv amalga oshmasa, bu “Eron uchun juda yomon kun” bo‘lishini ta’kidladi. Bu haqda BBC xabar berdi.
Eron tashqi ishlar vaziri uchrashuvni tasdiqlab, muzokaralar “bilvosita” o‘tkazilishini va bu jarayon “sinov va imkoniyat” ekanini aytgan. Uchrashuv Ummonda bo‘lib o‘tishi ma’lum qilingan.
Tramp o‘zining birinchi prezidentlik davrida Eron bilan tuzilgan yadro kelishuvini bir tomonlama bekor qilgan edi. Shu sababli, u taklif qilayotgan yangi muzokaralar va bitim haqida gapirar ekan, Eronni shartlarni buzmaslikka chaqirdi.
AQSH va Eron o‘rtasidagi ushbu muzokaralar global xavfsizlikni shakllantirishda muhim ahamiyatga ega bo‘ladi. Eronning yadro faoliyatini cheklash AQSH va uning ittifoqchilari uchun asosiy tashqi siyosiy maqsad bo‘lib qolmoqda. Trampning so‘zlariga ko‘ra, agar muzokaralar muvaffaqiyatli yakunlansa, bu Eronni katta xavfdan saqlab qoladi.
AQSH Eronga hujum qilish bilan tahdid qildi
AQSH prezidenti Donald Tramp mart oyi boshida Eron oliy rahnamosiga maktub yo‘llab, unga yangi yadroviy kelishuv tuzish uchun ikki oy muhlat bergan edi. Maktubda yangi yadroviy bitim bo‘yicha muzokaralar o‘tkazish qat’iy talab qilingan. AQSH maktub mazmuni haqida bir necha ittifoqchisini, jumladan Isroil, Saudiya Arabistoni va Birlashgan Arab Amirliklarini ham xabardor qilgan.
Eron oliy rahnamosi maktubni olgach, Trampning muzokaralar haqidagi taklifini “aldov” deb atagan. Eron prezidenti Mas’ud Pezeshkiyon maktubga javoban AQSH bilan ikki tomonlama muzokaralar o‘tkazishdan bosh tortgan. Tehron Vashington bilan yadro dasturi bo‘yicha muloqot faqat uchinchi davlatlar vositachiligida amalga oshirilishi mumkinligini ta’kidlagan.
Bunga javoban Tramp agar kelishuv bo‘lmasa, Eronni bombardimon qilish bilan tahdid qilgan. Mazkur tahdidlar fonida Eron raketalarini jangovar shay holatga keltirgan. Uchirishga tayyor bo‘lgan raketalarning katta qismi butun mamlakat bo‘ylab havo hujumlariga bardosh bera oladigan tarzda loyihalashtirilgan yerosti inshootlariga joylashtirilgan.
Bundan tashqari Oyatulloh Ali Xomanaiy armiyani yuqori jangovar shay holatga keltirishga ko‘rsatma bergan. Qaror AQSHning ehtimoliy harbiy operatsiyasi haqidagi xabarlar fonida qabul qilingani aytilmoqda. Eron Iroq, Kuvayt, Birlashgan Arab Amirliklari, Qatar, Turkiya va Bahraynga agar ular AQSHga o‘z hududidan hujum qilishiga yo‘l qo‘ysa, buni dushmanlik harakati sifatida baholashi va harbiy yo‘l bilan javob berishi mumkinligi haqida ogohlantirgan
Izoh (0)