Isroil so‘nggi 48 soat ichida AQSHdan Eronga qarshi harbiy operatsiyaga qo‘shilishni so‘radi. Bu haqda ikki yahudiy amaldoriga tayanib Axios xabar berdi.
Ma’lum qilinishicha, Tramp ma’muriyatidan Eronning uranni boyitish dasturining asosiy elementlaridan biri bo‘lgan Fordo yerosti yadroviy inshootini yo‘q qilishda yordam so‘ralgan. Isroil murojaatining asosiy sababi texnik qiyinchiliklardir.
Isroil armiyasida tog‘li hududda katta chuqurlikda joylashgan obyektga samarali zarba berish uchun zarur bo‘lgan arsenal, xususan, bunker bombalari va og‘ir bombardimonchi samolyotlar yo‘q. AQSH esa tegishli qurollarga va yaqin atrofdagi bazalardan zarba berish imkoniyatiga ega.
Tramp yaqinda Isroil bosh vaziri Binyamin Netanyaxu bilan suhbatda zarurat tug‘ilganda shunday qadam ko‘rsatishi mumkinligini istisno etmagan. Biroq hozirda AQSH bunday imkoniyatni ko‘rib chiqmayapti.
Oq uyning yuqori martabali mulozimiga ko‘ra, Vashington urushga to‘g‘ridan to‘g‘ri aralashishni xohlamaydi, hatto gap “bitta zarba” haqida ketayotgan bo‘lsa ham. AQSH mojaroni diplomatik yo‘l bilan hal qilishga umid qilmoqda.
Agar Eron buni istasa, bizda tinch yechimga erishish imkoniyati bor. Tinchlikka erishishning eng tez yo‘li — Eronning o‘z yadro qurolidan voz kechishidir, deydi Oq uydagi manba.
Agar Fordo majmuasi Isroil zarbalaridan keyin ham ishlashda davom etsa, Eron yadro dasturini “yo‘q qilish” maqsadiga erishib bo‘lmaydi, deb yozadi Axios.
Ba’zi mutaxassislar fikricha, Isroil bunker bombalar ta’sirini hosil qilish uchun bir nishonni qayta-qayta bombardimon qilishi mumkin. Biroq bundan-da xavfliroq yo‘l — maxsus kuchlarni obyektga reydga yuborish bo‘lishi mumkin.
Isroil maxsus kuchlari 2024-yil sentyabr oyida shunday operatsiyani amalga oshirgan edi. Ular Suriyada joylashgan yerosti raketa zavodiga bostirib kirib, portlovchi moddalarni joylashtirib, uni portlatgan. Butun operatsiya atigi ikki soat davom etgan.
Isroil yadro dasturini izdan chiqarish maqsadida Eronning uran boyitish inshootlari, sentrifuga ishlab chiqarish liniyalari va yadro olimlarini nishonga olmoqda. Shunday so‘nggi hujumlarda kamida 14 nafar eronlik yadrochi olim halok bo‘ldi.
Izoh (0)