Eron oliy rahnamosi Oyatulloh Ali Xomanaiy Isroilning hujumlari boshlanganidan bir necha soat o‘tgach, yerosti bunkeriga tushgan. Bu haqda manbalarga tayanib Iran International xabar berdi.
Manbalarga ko‘ra, Xomanaiy bo‘lgan obyekt Tehronning shimoli-sharqidagi Lavizan tumanida joylashgan. Oliy rahnamo bilan birga uning oila a’zolari ham boshpanada yashamoqda. Xomanaiy Isroilga qarshi oldingi operatsiyalarda — 2024-yilning aprel va oktyabr oylarida ham aynan shu bunkerda yashiringani aytilmoqda.
Isroil 15-iyun kuni Eronning Turkmaniston chegarasi yaqinida, yahudiy davlatidan 2,3 ming kilometr uzoqlikdagi Mashhad aeroportiga zarba bergan. Bu bilan Xomanaiyga o‘zini hech qayerda xavfsiz his qila olmasligini ko‘rsatmoqchi bo‘lgan, deydi manba.
Reuters’ning AQSH hukumati ichkarisidagi manbalariga ko‘ra, AQSH prezidenti Donald Tramp Isroilning Xomanaiyni yo‘q qilish rejasiga “veto” qo‘ygan. U Eronga qarshi keskin chora ko‘rishga faqatgina Eron AQSH fuqarolariga to‘g‘ridan to‘g‘ri zarba bergandagina rozilik bildirishini aytgan.
Biroq Isroil Milliy xavfsizlik kengashi rahbari Szaxi Hanegbi bu da’volarni rad etib, ularni “soxta xabarlar mamlakatidan kelgan uydirma” deb atagan. Shu bilan birga, Xomanaiy Isroil nishoniga aylanishi ehtimoli istisno etilmagan. Isroillik yuqori martabali amaldorlardan biri Oyatullohning o‘ldirilishi Isroil uchun “tabu emas”ligini aytgan.
Isroil va Eronning o‘zaro hujumlari 13-iyunga o‘tar kechasi boshlandi. Yahudiy davlati “Isyonkor sher” operatsiyasini olib bormoqda. Uning doirasida Isroil qo‘shinlari Eron hududidagi yadroviy va harbiy obyektlarga hujum qilmoqda.
Eron oliy rahnamosi fuqarolarga yo‘llagan murojaatida Isroilning Eronga bergan zarbalarini jinoyat deb atagan. U Isroilni “achchiq va dahshatli taqdir” kutayotganini ta’kidlagan. Tehron “Haqiqiy va’da 3” nomli operatsiyani boshlagan. Uning doirasida Isroilga yuzlab raketalar uchirilgan. Ikki davlat bir-biriga hujum qilishda davom etmoqda.
Izoh (0)