Eron raketalari 16-iyun kuni Isroilning havo mudofaasini yorib o‘tib, Tel-Aviv va Xayfa shaharlariga yetib bordi. Oqibatda kamida 5 kishi halok bo‘ldi va 100 dan ortiq odam yaralandi. Bu haqda Reuters xabar berdi.
Eron Islom inqilobi qo‘riqchilari korpusiga ko‘ra, hujumda Isroilning mudofaa tizimini chalg‘itgan yangi usul qo‘llanilgan. Natijada Isroil havo hujumidan mudofaa tizimlari bir-biriga hujum qilgan. Bunga javoban yahudiy mudofaa vaziri Eron poytaxtiga javob zarbasi berish bilan tahdid qilgan. U bu zarbani “Tehron aholisi o‘z boshidan o‘tkazishi”ni ta’kidlagan.
15-iyun kuni yuqori aniqlikdagi zarba oqibatida Islom inqilobi qo‘riqchilari korpusi razvedka boshlig‘i Muhammad Kozimiy va uning o‘rinbosari o‘ldirilgan. Shundan so‘ng Isroil aviatsiyasi Islom inqilobi qo‘riqchilari va Eron qurolli kuchlarining qo‘mondonlik markazlarini yana bombardimon qilgan.
Mojaroga bog‘liq holda ko‘tarilgan neft narxi 16-iyun kuni 0,62 foizga oshib, bir barrel uchun 74,69 dollarni tashkil etgan.
Isroil armiyasi juma kuni Eronning o‘z yadro quroliga ega bo‘lishiga yo‘l qo‘ymaslik maqsadida keng ko‘lamli havo operatsiyasini boshladi. Har kuni Tehron, Eron raketa zavodlari hamda Natanzdagi uran boyitiladigan obyektlar bombardimon qilinmoqda. Isroil Eron qurolli kuchlarining bir qator qo‘mondonlari, Islom inqilobi qo‘riqchilarining elita bo‘linmasi a’zolari, shuningdek, yadro sohasidagi olimlarni o‘ldirdi.
Eron Sog‘liqni saqlash vazirligining xabar berishicha, o‘tgan hafta boshlangan keskinlashuv oqibatida Eronda halok bo‘lganlar soni 224 kishiga yetdi, ularning 90 foizi tinch aholi vakillaridir. Isroil tomonidan qurbonlar soni 18 kishiga baholanmoqda.
Izoh (0)