Vermont shtati senatori Berni Sanders Isroil bosh vaziri Binyamin Netanyaxuni AQSH va Eron o‘rtasidagi yadroviy kelishuv bo‘yicha muzokaralarni barbod qilganlikda aybladi. Siyosatchi bu haqda 14-iyun kuni X ijtimoiy tarmog‘idagi sahifasida ma’lum qildi.
“Netanyaxuning ekstremistik hukumati xalqaro huquqqa doimiy bo‘ysunmasligi oqibatida dunyo yanada xavfli va beqaror holatga keldi”, dedi Sanders o‘z bayonotida.
Isroil kuchlari 13-iyunga o‘tar kechasi Eronga hujum qildi. Zarbalar oqibatida yadroviy va raketa obyektlari shikastlandi, oliy harbiy qo‘mondonlar va olimlar halok bo‘ldi. Eron bunga qat’iy javob berishni va’da qildi.
“Avvaliga u G‘azodagi bolalar ochligidan urush quroli sifatida foydalanmoqda, bu esa Jeneva konvensiyalarining vahshiyona buzilishidir. Endi uning Eronga qonunga xilof bir tomonlama hujumi keng ko‘lamli mintaqaviy urushga aylanib ketish xavfini tug‘dirmoqda”, deya ta’kidladi senator.
Sandersning ta’kidlashicha, bu zarbalar Eron yadro dasturi atrofidagi uzoq yillik kelishmovchiliklarni diplomatik yo‘l bilan hal qilishga intilayotgan AQSH maqsadlariga ham to‘g‘ridan-to‘g‘ri zid keladi.
“Muzokaralar yakshanba kuniga rejalashtirilgan edi, ammo Netanyaxu buning o‘rniga hujum boshlashga qaror qildi”, dedi Sanders.
U AQSHni “Netanyaxuning navbatdagi urushi”ga aralashmaslikka chaqirgan.
Senatorning fikricha, AQSH xalqaro hamjamiyat bilan birgalikda mojaroning avj olishiga yo‘l qo‘ymaslik va urushayotgan tomonlarni muzokaralar stoliga o‘tqazish uchun “barcha imkoniyatlardan foydalanishi” kerak.
13-iyunga o‘tar kechasi Isroil Eron yadro quroli yaratishga yaqinlashgani sababli yadroviy, harbiy obyektlar va yuqori martabali harbiylar joylashgan manzillarga hujum qildi.
Zarbalar oqibatida Islom inqilobi qo‘riqchilari korpusining bir necha rahbarlari va eronlik fizik-yadroshunoslar halok bo‘ldi. Ular orasida Korpus qo‘mondoni Husayn Salamiy, Eron Qurolli kuchlari bosh shtabi boshlig‘i Muhammad Baqeriy, IIQK “Xotam al-Anbiyo” bo‘linmasi qo‘mondoni G‘ulom Ali Rashid, shuningdek, olimlar Faridun Abbosiy Davoniy va Ozod Muhammad Mahdiy Tehronchiy bor. Jami 78 kishi halok bo‘ldi, 320 dan ortiq kishi jarohat oldi.
O‘sha kuni kechqurun Islom inqilobi qo‘riqchilari korpusi Isroilga qarshi “Haqiqiy va’da-3” javob operatsiyasi boshlanganini e’lon qildi. Eron Isroilga uch marta raketa zarbalari berdi, zarbalar bir nechta shaharlarda qayd etildi. 70 dan ortiq kishi jarohat oldi, bir ayol halok bo‘ldi. Shu paytda Tehronda yana portlashlar eshitildi.
Eron va AQSH aprel oyida yadroviy kelishuv bo‘yicha muzokaralarni qayta boshladi, besh raund o‘tkazildi. Ular asosan Ummon hududida va bilvosita tarzda bo‘lib o‘tdi. Eron yadro quroli yaratishga intilish haqidagi ayblovlarni rad etmoqda va kelishuv doirasida uranni boyitishdan voz kechmoqchi emas.
Izoh (0)